【森美旅行團】由拎住Wyman手繪地圖遊東京開始 到帶團遊日體驗精進匠心
撰文：潘小熊｜圖片：Woody、部分由森美提供
【森美旅行團】第一次去日本 就留下了遺憾
Q：第一次去日本是何時？和誰？
森美：我讀書時哈日文化最流行，到出來工作，在商台返工有糧出第一個自主旅行就揀了去日本，應該都有22年前。當年拍拖跟旅行團和女朋友一齊去（即現在的太太），記得好似係去大阪，其實去邊唔記得，只記得搭過子彈火車，同埋當時有一把¥2,000的雨傘想買，但最終因為嫌貴、覺得沒有用而沒有買，但這件事一直記掛在心，所以我仍欠太太一把啱心水的傘子。
愛上日本的 堅守再精進
Q：最喜歡日本甚麼？
森美：日本的文化好有趣，雖然她大部分文化都是從中國傳入，但比中國保留得更好！好像木建築，今天仍有工匠保留到入榫的手藝，能夠堅守「道」，而且會再精進，精益求精。再簡單些，就飲食來說，天婦羅、和牛、壽司、大阪燒等都是外地傳到日本，但經過日本人的匠心，就變成日本出名的美食，這是日本令人愛上的地方。
傳說中的Wyman手繪東京地圖
Q：曾去過日本哪些地方？
森美：人生唔同時期去的地方都不同，年輕時經常去東京，去還未叫裏原宿的小巷睇潮嘢買衫，我哋有張商台人暗暗在傳閱的Wyman手繪東京地圖，每個人都會跟住去朝聖。人大了不再只追求購物，就開始去日本的溫泉、公園，去下九州、鹿兒島、屋久島，去合掌村、有馬、草津等等，開始就不同季節去睇花睇風景。
Q：你最喜歡哪個日本溫泉？
森美：應該不少人第一次都係去箱根吧，哈哈～那種舊式溫泉好似有貞子會爬出來咁，但我都好享受那種大自然。而近年就鍾意去草津，因為多嘢玩，有壯觀的湯田，又有溫泉街行，又有小瀑布觀光，都幾好玩。去草津前又可以去下輕井澤行Outlet，兩三日的行程就已經好豐富。四國的道後溫泉都好好，既有悠久歷史，又可以幻想下究竟宮崎駿如何從道後溫泉創作出有趣的作品，而且附近有好多觀光位，夠晒多嘢玩。
Q：點解旅行團會揀帶大家去四國德島玩呢？
好快就到東京奧運，日本政府大力推廣旅遊，以前無咩人去的上野，而家都多人過旺角啦！當大家連大阪、京都都去勻的時候，其實四國德島都有好好的文化同景色，而且遊人少啲，在睇奧運人逼人前，去輕鬆感受下日本文化係好好的選擇。大家可以去睇鳴門漩渦，雖不是最大的漩渦，但可以好接近。日本人好識欣賞不同時候及季節，不一定要睇所謂的「最佳」才是好，更應要識得享受現在。
東京口袋名單 私心餐廳推介
Q：可以推介東京、大阪的私房餐廳景點嗎？
近年常去的，是一間戰後頗有歷史的店，新宿的鳥茂。聽名字以為吃雞串燒，原來是間主要吃經燒製或生內臟的餐廳，又令我學識了原來日本人最初吃燒鳥不是只吃雞，而是吃內臟，很有趣！我是自己誤打誤撞找到的，那些內臟、生豬等可謂大挑戰，而且最有趣是這些愈貴的串燒店，食物就愈生，都幾得意，好味得打破我對串燒的感覺。
另外，近年多了一家大細遊日本，不時都會去公園，上次在東京國營昭和紀念公園邊踩單車邊賞花，又大又靚，玩完大半日再出番新宿等地食嘢，好滿足。
去大阪的話，我通常都住在梅田那區，附近的北新地就最啱搵食！其中一間一定要訂位的雞串燒巿松，標明用走地雞，雞肉食落好明顯可感受到三個層次：雞皮、脂肪及雞肉，而且十分嫩滑。最驚訝就是雞腎，又係半生的，不過超好吃呀！
記得講：「個廁所閂埋」
Q：去了那麼多次日本，哪句日文你覺得很有用、很有意思的呢？
有一句我很想牢記的，就是那句食完飯表示感激的「個廁所閂埋」（ごちそうさま，音：Gochisou-sama），每次食到好味的食物想表示感激可以講「個廁所閂埋」，日本人聽到會好開心。我記得以前在梅之丘的美登利壽司吧枱食壽司，吃到美味的壽司都講「個廁所閂埋」，師傅見到我們吃得很開心，不停的請我們吃好吃的壽司，那種互相欣賞的感覺，令雙方都好開心。
