MegaBox哈利波特聖誕飄雪「活米村」6大打卡位＋遊戲區：9 ¾ 月台＋霍格華茲列車＋20呎高聖誕樹
撰文：Icy｜圖片來源：新假期編輯部
哈利波特飄雪「活米村」降臨MegaBox 記者直擊！
9 ¾ 月台＋霍格華茲列車＋20呎高聖誕樹
大型聖誕裝置哈利波特「活米村」已經降臨九龍灣MegaBox陪大家渡過冬日，首日已經吸引大批市民到場打卡影相，記者率先現場直擊！場內有6大打位位，包括9 ¾ 月台、霍格華茲特快列車、桑柯的惡作劇商店、蜂蜜公爵糖果店、貓頭鷹郵局等，每個都係經典場景，逼真到如臨其境，展出期由即日起至2022年1月2日，哈利迷必定要去朝聖！
6大經典場景打卡位 彷如置身哈利魔法世界
1. 9 ¾ 月台
每次由人間穿越去魔法世界，都一定要經過國王十字車站內嘅「 9 ¾ 月台」。今次將呢個經典場境重現，仲有埋架手推車可以比你打卡影相，咁多位粉絲預備同哈利展開旅程啦！
2. 霍格華茲特快列車
每年9月1號，霍格華茲嘅學生都會乘坐呢架特快列車前往校園，對於每位角色都意義重大，所以絕對係另一大矚目打卡位！
3. 20呎高閃爍華麗聖誕樹夢幻飄雪表演
同場當然唔少得聖誕必備嘅大型聖誕樹，有成20呎高，掛飾足以閃爆全場，打卡一流！由上午10時至下午9時，每逢正點更會有夢幻飄雪睇，等大家都係香港都可以感受到冬日異國浪漫。
4. 桑柯的惡作劇商店
「桑柯的惡作劇商店」係霍格華茲學生去活米村遊玩時最喜愛嘅去處，大家都係呢到購入惡作劇及變戲法用嘅材料，妖精店員會喺窗前對大家擺出趣怪表情，快啲去捕捉佢地啦！
5. 蜂蜜公爵糖果店
「蜂蜜公爵糖果店」會出售各式各樣嘅魔法糖果，深受霍格華茲嘅學生喜愛。
6. 貓頭鷹郵局
「貓頭鷹郵局」會為無貓頭鷹嘅人寄出信件，係電影中都有頻頻出場。
- 「Harry Potter的聖誕魔法世界」大型裝置
- 日期：2021年11月18日至2022年1月2日
- 地點：九龍九龍灣宏照道 38 號企業廣場 5 期 MegaBoxL5中庭
聖誕期間限定POP UP禮品店 獨家產品率先買
期間限定禮品店位於MegaBox G中庭，售賣各款Harry Potter最新精品，產品由數十蚊至幾千蚊不等，包括衣物、文具、飾物及精品等，有部分更加係獨家產品，上網都買唔到㗎！有實物仲可以拎上手慢慢睇，咁多位哈利迷係時候嚟瘋狂shopping啦！
- Harry Potter聖誕禮品店
- 日期：2021年11月18日至2022年1月2日
- 時間：11:00 – 21:00
- 地點：九龍九龍灣宏照道 38 號企業廣場 5 期 MegaBox G中庭
魔法世界互動遊戲區 一嘗巫師滋味
逢星期六、日及公眾假期，只需讚好MegaBox Facebook 專頁，再上載活動相片至個人Facebook 帳戶，就可以參與「魔法棒挑戰站」以及「魁地奇投球特訓遊戲」！想知自由有無Magic Talent，就過嚟挑戰自己啦！
1. 魁地奇投球特訓遊戲
挑戰者可以騎上1：1飛天掃帚，鬥快將浮球投入門柱內，要成為出色嘅魁地奇球員就靠今次喇！
2.魔法棒挑戰站
「魔法棒挑戰站」可以使用魔杖施展唔同咒語，感受成為巫師女巫嘅滋味。
- 魔法世界互動遊戲區
- 日期：2021年11月18日至2022年1月2日（逢星期六、日及公眾假期）
- 時間：12:00 – 19:00
- 地點：九龍九龍灣宏照道 38 號企業廣場 5 期 MegaBox L9展覽廳
常見問題
問：「活米村」聖誕裝置會擺放多久？
答：由即日起至2022年1月2日。
問：怎樣才能參與「魔法世界互動遊戲區」內的遊戲？
答：讚好MegaBox的Facebook專頁及上載活動照片至個人帳號即可免費參加遊戲。
「活米村」聖誕裝置會擺放多久？
由即日起至2022年1月2日。即睇哈利波特「活米村」6大打卡位：詳情
怎樣才能參與「魔法世界互動遊戲區」內的遊戲？
讚好MegaBox的Facebook專頁及上載活動照片至個人帳號即可免費參加遊戲。
