香港人缺點多？網民數出5大特點：拒絕思考、乜都批評｜網絡熱話

撰文：PC｜圖片：新傳媒照片庫、Pexels、Instagram

香港人缺點一：拒絕思考 唔睇書

網民一開始就指出大部分香港人都好少睇書，就算睇都只係睇一啲關於日常生活或者花邊新聞嘅雜誌同書。行書店見到暢銷書榜，頭三位都係一啲風水書或生活雜誌！從而大家對於其他知識，甚至國際局勢都咩都唔知。再者網民更指出相比其他亞洲國家，香港人甚少討論返香港嘅歷史！

香港人缺點二：既自大又自卑 過分崇拜／反對外國事物

之後，有網民指香港人對其他國家事物嘅態度好極端，永遠都係非黑即白。例如一個人好鍾意韓國娛樂，就係咁踩香港樂壇，更引用已故黃家駒嘅一句說話：「香港冇樂壇，只有娛樂圈」去終結討論；反之亦然，假設一個人唔鍾意韓國，就會話人哋「垃圾民族」，一句就抺殺晒人哋各方面的努力。同時香港人都對於自己嘅軟實力感自卑，香港人會覺得日本動漫好出色，但就完全忽略咗同樣一樣努力嘅香港藝術家。

香港人缺點三：太過挑剔 凡事都吹毛求疵

香港人好鍾意任何事稍有少少瑕疵都會批評？網民指出港人只要發現人哋唔跟自己一套做嘢就會反面，平時處事好mean又虛偽，彈人多過讚人。香港人唔團結，更延伸到政治上嘅問題，例如各個政黨派別都互相攻擊。正因為香港人嘅慣性批評，更加引致到大家都唔鍾意表達自己，變得被動。

缺點四：以錢為上 消費主義重

金融業為重嘅香港，好多時講嘢都會同錢有關。但就係呢個原因，令到好多香港人做好多事都只會圍繞住「錢」呢個字，無論係香港人平時睇嘅書或者網站，都係講消費為主，因為如果冇心消費，社會就會搵唔到錢。

缺點五：對社會冷漠 凡事都事不關己

基於上一個原因，樣樣事都為錢，搞到香港人都變得愈嚟愈冷漠。對住社會每件大大小小嘅事，都會擺出「多一事不如少一事」嘅心態，更有人會成日以「要返工，不了」去推走自己應該關心嘅社會大小事，大家都只會專注喺搵錢同自身嘅事。所以香港人成日都俾人話係「政治冷感」。

大量網民表示同感

討論一出，引發好多網民都覺得好有同感，更有曾經喺外國生活過嘅網民指出回流返嚟都覺得香港變得太快，香港人再唔改善嘅話香港本土文化就會俾好多其他地方文化取代。

網民列優點反駁！

有網民指雖然香港有不少缺點，但同時都有不少優點！當中必數「獅子山精神」，港人經常互助扶持，非常團結！而且，香港人為人率性直接，辦事效率高，加上有事就直接說出口，超爽快！最最最重要，就是港人捱得苦，肯學肯捱！

撰文：PC｜圖片：新傳媒照片庫、Pexels、Instagram