街泊咪錶逾時險抄牌 網民路過代入$2被炮轟！網民指出一大錯誤：好心做壞事
廣告
「助人為快樂之本」、「路見不平，拔刀相助」係好多人嘅座右銘，但日前有人出帖顯示自己仗義相助嘅行為，見到有街泊位咪錶差唔多夠鐘，為咗避免車主俾人抄牌，於是出手代為入錢。本以為各網民對於呢種無私嘅行為非常受落，但估唔到樓主反而被認為只係想「拎光環」，咁樣做幫唔到人之餘仲有嫌助長歪風！
咪表逾時險抄牌 出手相助代入錢反被罵？
最近喺「全港違例抄牌提示區」群組有人出帖，標題「師兄，葵芳抄牌好勁，幫到就幫一次了。」，相中葵芳運動場對出街泊位一架私家車，停車收費錶 （俗稱咪錶）上顯示剩餘時間15分鐘，似乎係樓主路過見到時咪錶己經顯示逾時，再唔入錢就有機會「食牛肉乾」被抄牌，於是好心幫車主入咗錢。
但估唔到網民反應一致認為，樓主只係想炫耀自己做好事，目的係得到別人嘅讚賞，而唔係出於好心，唔係嘅話做好事咪做好事，唔需要擺上網。於是各人紛紛揶揄樓主，表示自己都好等錢洗，小至冇錢開飯，大至樓宇按揭，唔知樓主可唔可以幫幫手，學樓主話齋，幫得就幫手吖嘛係咪？
「好人唔係咁做！」網民表示多事行為最討厭！
其實大家咁大反應嘅背後，原因亦都好明確。有揸車嘅朋友都知道香港搵街位泊其實真係難過登天，咁好彩搵到個位，平過停車場咁多都唔肯入錶，如果俾人抄牌其實真係唔抵可憐。有人就表示如果係職業司機，部車係要來搵食嘅都算，但見部車係新新地嘅Benz，真係唔抵幫，有錢不如幫下基層市民好過。亦有網民提出新停車收費錶已經可以遙距入錶，仲有app可以睇到剩返幾多時間，咁方便都仲唔入錢係真係抵死。
仲有網民提出，街泊咪錶逾時其實已經違法，樓主咁樣做有可能係妨礙司法公正，就好似你見到有犯人被追捕，你開門俾佢匿埋咁。最嬲嘅係車主行為好乞人憎，唔入錢又要霸住個錶位，而樓主呢啲所謂嘅「幫手」其實就係幫緊呢種唔正確嘅行為，助長歪風，令到其他真係有需要嘅人無位泊車，所以第時樓主等唔到錶位嘅時候都冇得怨人！
事主在咪錶停車場做了什麼？
事主在咪錶位看到一輛私家車咪錶夠鐘險被抄牌，於是幫入$2 （15分鐘），被網民炮轟…詳情
網民指事主最錯的是？
除了幫入錶外，網民指出最錯誤的是..詳情
圖片來源：FB@全港違例抄牌提示區
