大嶼山大澳自駕遊有禁區紙可免費泊車？自駕新手神邏輯指不應抄牌！網民妙問妙答：香港傻人特別多｜玩樂熱話

大嶼山大澳自駕遊 泊車有禁區紙不應抄牌？自駕新手提一大理據！

日前於網上「全港違例抄牌提示區」入面，有人開post 問「我揸車入去已申請咗大嶼山自駕遊大澳 泊車會抄牌？」，其他網民即刻搲晒頭，但呢啲仁兄提出左一個理論就係「因目測係沒有足夠泊車位泊」咁話，意思係，你俾得我揸車入去玩，係咪應該預返足夠泊車位置俾我哋自駕遊嘅人，既然你都唔夠位泊，咁我隨街泊實在無可厚非，唔可以抄我牌。（好似係咁）

其實禁區紙全名為「封閉道路通行許可證」，配合大嶼山自駕遊計劃，係比市民喺平日交通唔繁忙嘅日子駕駛私家車經大嶼山嘅封閉道路前往昂坪、大澳、長沙同梅窩等地點作消閑及康樂用途。運輸署關於大嶼山自駕遊計劃嘅專頁上面，係許可證條款一欄以下清楚列明「大嶼山封閉道路許可證並無授予任何泊車特權」，許可證亦都不可轉讓。

網民妙問妙答：香港傻人特別多

面對一個咁有趣嘅觀點，網民踴躍討論，一部份人好心分享自己個人經驗，表示日前上鶴嘴山都唔見有人抄牌；另外大澳停車場平日通常都有位，日泊都只係$320，而且只要你唔泊上行人路，大嶼山唔阻人，一般都好少抄牌；有人清楚解釋有咗禁區紙只係代表你可以駛入禁區，並唔係「禁區停泊紙」。

但有一部份比較幽默嘅網民就舉一反三，表示根據同一個邏輯，目測現時全香港都唔夠車位，係咪代表可以周圍泊車？又話唔知道原來自駕遊包埋泊車，如果唔係一早去申請，而呢張禁區許可證應該改名做「違泊許可證」；搞笑嘅係有人曲線一問，機場都係喺大嶼山，你呢張禁區紙係咪可以入埋去機場禁區？