啟德被吹大咗？！網民列3宗罪質疑：有地下購物街、雙子塔SOGO都冇用

啟德建全港最長地下購物街＋雙子塔SOGO！

近年啟德新區發展迅速，有多個新樓盤落成，並開通了啟德港鐵站，往後亦有地下購物街連接啟德站及九龍城傳統區域。早前有指啟德SOGO旗艦店預計最快今年落成開幕！另外有9間地產公司將聯手在啟德打造全新綜合娛樂休憩區Park Peninsula，場地集娛樂、酒店旅遊、體育、商業於一身，有望成為最新玩樂蒲點，不過有網民以「啟德算唔算誇大左？」為題，認為啟德的發展被過份吹捧。

網民質疑啟德發展被誇大三宗罪：根本係康城2.0！

1.交通唔方便

帖文引起大批網友討論，指啟德的交通配套差，表示雖然起了地鐵站，但位置不方便，而且興建單軌項目亦被擱置令啟德發展區失去主要幹道，稱「講到會變將來黃埔咁，又話地鐵直到，勁方便。事實上係不毛之地，就好似康城個商場講足十年都未起好，留名睇買左啟德既入黎叫生叫死」、「地鐵行過去都要十幾二十分鐘，好唔方便」、「宜家住係度嘅人要面對交通唔方便、配套少嘅問題，但就要日日承受周圍不停起樓嘅代價 ，吸足十年塵先見到成果」。

2.配套唔完善 被批是康城2.0

除了交通有問題，有唔少人指啟德周邊配套未完善，有居住啟德的網民稱「住緊，除左租平少少真係無任何優點悶到抽筋，附近仲要大部份藍店，要行去新莆崗先好少少」，另有網民表示「好少地方行」、 「去九龍城 Mikiki 九龍灣megabox都係遠」，唔少人都以啟德及20年前的將軍澳作比較， 當時將軍澳是新社居的社區設施的匱乏，更有人以康城2.0來形容，表示啟德要發展成熟超碼要等多10年。

3.貨不對辦！吹捧成CBD高檔商住區變基層集中地

政府有意將啟德打造成的CBD（核心商業區），但有網民認為事實上整個區域規劃「貨不對辦」，目前啟德區多公屋及居屋，又將會有過渡性房屋，有網民稱「天環隔離仲要起800 間過渡性房屋， 一大班基層進入， 社會共融」，留言指「其實根本啟德就變咗大型住宅區，邊度有CBD ？咪講觀塘，九龍灣寫字樓都多過啟德」，「同數碼港一樣，淪為地產項目」，「好似搞startup咁，未搞之前吹到天花龍鳳，搞搞吓搞唔掂就吹另一個project，依家就吹北區」、「公屋+居屋+私人住宅嘅地方，同青衣、長沙灣個堆差唔多」。

亦有網友理性分析「覺得唔算誇大，啟德始終多啲商業地，市區已經無呢種規模既土地發展，只不過政府將佢搞到X哂，單軌車又起唔到，又起新移民公屋喺外圍有礙觀瞻， 但始終贏地段同沙中線，長遠一定有潛力過將軍澳呢類幾乎純住宅區 ，無得比。」但他指出收成期未到，而且樓太密又多新移民，如果居住的角度就未必舒服。

資料來源：連登討論區