P牌車主玩報復打橫泊車阻駛出 網民怒轟無品野蠻兼自私
廣告
一個人有無品，睇駕駛態度都會略知一二，近日FB上就出現咗一單P牌車主將自己部Honda打橫泊正事主㗎車正前方，阻礙事主出入的事件，導致事主4點等到11點，連工都返唔到，原因疑似是為咗報復事主上次唔泊過小小比P牌車主㗎BB車方便出入。而事主最終亦只能無奈放生P牌車主，引發網民熱烈討論。
撰文：GW｜來源：Facebook@小心駕駛(討論別人駕駛態度)
事主表示自己喺屋苑停車場嘅月租車主，前一日泊好車後，翌日準備揸車外出時發現自己車位前有一架黑色Honda P牌車，打橫泊正自己部車前面，導致無法駛出，叫管理處幫手甚至報警都無用，事主更稱「自己工冇去返，堂冇得上，比佢白白浪費咗 7 個鐘嘅時間，但最後冇後果咁放生左條友！」
事主後來表示，該輛P牌Honda疑似是同屋苑住客的車，上次因P牌車主要求事主「泊過啲架車俾佢架 BB 車過」，但遭到事主拒絕，所以今次的行為是為了報復。
事主總共報警求助3次，警察到場後卻指該停車場是私人地方，所以無計可施。事主亦尋求屋苑管理處幫助，管理處就表示要發出3封警告信後才可鎖車，所以無法即時協助。
事主就非常無奈的從4點等到11點，總共7小時，無法上班及上學。直到11時P牌車主才「施施然」現身，事主表明不追究責任，只要求道歉，P牌車主表現強硬，不認為自己有錯亦不打算將車泊回原位。最終由管理處多番勸告才將車駛走，但並無任何後果，令事主及網民氣憤。
網民就留言大鬧P牌車主，仲提供了好多「方法」去治這種「惡霸」，例如「Call拖車」、「等放大假泊返佢前面」、「拎個2蚊銀簽個名」、「益力多倒窗邊條膠」等等，亦怒轟P牌仔「自私無品野蠻」、「態度差之餘仲極度自我，遲早出大事」等等。
