打工仔控訴AEON逢星期三都排長龍 力插師奶阻住lunch time買飯｜網絡熱話

打工仔控訴逢星期三買飯AEON都排晒長龍

事主怒轟一班師奶、長者和不趕時間的人，選擇在中午繁忙時段去AEON購物，「人地返工中午放飯lunch時間得個零鐘，你班唔使返工又唔趕時間嘅就咪去同人逼啦。全日咁多時間，真係心急想買嘅咪早啲去囉，唔急住買嘅咪遲少少先去囉，做乜要揀喺人地lunch time先去呢，人地想買個飯食下姐，咁都要畀你班人阻住」。

事主：邊到有咁多時間同你慢慢等

事主更表示「平時lunch時間本身就多人出嚟買飯，你班人仲要揀喺依個時候先嚟買嘢，搞到畀錢條隊長到，攞住個飯排隊等畀錢等到lunch時間無咗一半，甚至都未畀到錢就完咗」，事主大呻大家無考慮過打工仔的感受，覺得他們有很多時間可以買嘢，偏偏要選擇中午買，「你地唔趕時間就話無所謂可以慢慢等，人地食飯時間係有限㗎，邊到有咁多時間同你慢慢等啊！」。

事主：你班人到底係無腦定係智障㗎！

事主更怒轟「你班人到底係無腦定係智障㗎？畀多少少同理心諗下人哋，咪喺啲人流高峰時段去同人逼啦。咁驚執輸蝕底你唔早啲去？你10點幾11點鐘去買唔得㗎？」，事主更強烈建議AEON要為一班打工仔整中午買飯的付款位，等一眾打工仔可以加快買到飯，不用排長龍同人逼。

網民一面倒大鬧樓主小事化大

網民一面倒紛紛留言大鬧樓主小事化大，「咁你點知唔係全日咁多人」、「咁多人咁你咪唔好去囉」、「明知AEON多人都要死落去買飯」、「真 ，根本除咗開舖收舖嗰陣，全日都咁多人，樓豬唔識醒水去食其他嘢」、「你包場咪得囉，使乜咁燥」。

資料來源：連登