趣怪得嚟又有創意！2019年6大愚人節搞作

撰文：Evita | 圖片：YouTube、香港消防處Facebook

2019年6大愚人節搞作

1｜Google

每逢大時大節總有新搞作嘅Google，今日(1/4)都唔例外，喺Google Map推出經典遊戲「貪食蛇」。大家只要打開Google Map 手機App嘅選單按鈕，就會見到開始玩「貪食蛇」， 㩒落去有得選擇各大城市，例如東京、倫敦，就連全世界都有得揀。

遊戲將會為期一星期，如果無裝Google Map App，大家都可以按 此網址 玩網頁版貪食蛇。

除咗「貪食蛇」外，Google更推出螢幕清潔器，只要發現屏幕有指紋同污垢，就會有隻小精靈出現透過微震動清洗螢幕。

2 ｜日本迪士尼

如果你係 Marvel 粉絲，都知道一班英雄喺《復仇者聯盟3》入面化成灰燼，未知Marvel隊長同蟻俠會點樣拯救各位，但係可以「確認」嘅係，米奇老鼠都會加入復仇者聯盟，現時積極展開訓練。

米奇同Marvel隊長一樣識發光，未知其實力係點，佢又會用咩方法對抗魁隆呢？

3｜Sony PlayStation

遊戲公司Sony PlayStation亞洲區亦發布愚人節活動「PlayStation紀念鎖匙扣合集」，主要將歷代PS主機 PS/PS2/PS3/PS4 打造成1比1鎖匙扣，大家可以隨時隨地拎住出街啦！

4 ｜多啦A夢

有網絡書店喺愚人節前將多啦A夢法寶上架，包括隨意門、縮小燈、翻譯蒟蒻同學生最愛嘅記憶麵包。而上市日期為4月1日。

不過當按購買時，就會彈出一句「此商品目前無法開放訂購，感謝您的支持，搏君一笑解千愁！祝您愚人節快樂！」

5 |日清

日清官方周邊產品網店推出一款耳機，由兩個杯麵作為耳罩，更話係採用大型優質紅色記憶泡沫耳墊、擴展頭帶等用料，可提供拉絲麵條柔滑的柔軟呵護。

麥克風利用外型同叉一模一樣，喺產品介紹欄指「可以取消所有基於啜食的混響，同時仍然提供清晰的通信」，姐係大家一邊打機一邊食嘢都唔怕嘈到對方。

可能產品實在太創新又搞笑，所以官網已經寫住「賣光了」，各位粉絲不妨期待下年愚人節日清又有咩得意產品。

6｜任何仁

突然彈起嘅消防處吉祥物任何仁都有愚人節搞作，一踏入4月1日凌晨，香港消防處Facebook就發布一張「任何仁四月天演唱會」海報，仲寫明「有今生無來世，絕不加場」。

專頁仲叫網民Click入連結，㩒入去原來係一條「任何仁四月天演唱會」短片，片中見到3位任何仁模仿《少林足球》情節，更將經典歌曲改編。

各大公司同機構為愚人節紋盡腦汁，都係想博大家一笑姐，唔知你哋又最鍾意邊份愚人節禮物呢？