用點餐機被後面客人嫌太慢 食客呻排隊者心急！反遭網民鬧爆｜網絡熱話
廣告
近幾年連鎖快餐店愛用自助點餐機，可以縮短人手之餘又減少出現大排長龍嘅情況，不過就有人喺「Tai Po大埔」Facebook群組發文表示自己點餐時因為諗太耐而畀後面女人催，但係樓主發文後畀唔少網民鬧返轉頭。
撰文：Evita｜圖片：Facebook@Tai Po大埔截圖、新傳媒照片庫
食客用點餐機太慢兼寸人
有網民喺Facebook發文表示喺太和麥當勞用點餐機，後面女士唔耐煩地話：「不如我幫你啦！」，而樓主就話：「我揀吓先。」
樓主：排點餐機都要等㗎啦！
樓主表示知道有好多人排隊，但認為「都要等㗎啦」。又話自己無背好晒餐牌，所以要邊揀邊諗。
我忘記左（咗）呢個包係無得配餐所以要取消重選，但點餐機不就要黎（嚟）咁用？
女士疑等太耐唔耐煩，於是重覆：「不如我幫你啦，你要咩啊？」
但係樓主則表示：「多謝你咁熱心，不如你幫我畀錢啦！」
網民反鬧爆：唔識就去收銀嗰邊買！
雖然樓主疑似想網民評吓理，不過卻得到唔少人鬧爆，認為「唔識就去收銀嗰邊買」、「有啲人得好少時間食飯，都要畀佢阻住」、「要慢慢揀就自己download個apps」等等。
不過原文已經被樓主刪除了……
自稱樓主朋友幫口：佢喺視障人士
後來有自稱係樓主朋友嘅網民，表示樓主係視障人士，可能畀人催到唔耐煩，所以講嘢先寸咗啲，亦認為其實樓主可以解釋自己嘅難處，而唔需要擺上網。（究竟係咪幫緊樓主呢？）
撰文：Evita｜圖片：Facebook@Tai Po大埔、新傳媒照片庫
