麻煩客為兩蚊追舖頭追足兩日！事隔一星期先追！台飲店員網上大呻反被鬧｜網絡熱話
廣告
麻煩客真喺好常見，收銀員又或者顧客，都可能會遇過找多或找少錢嘅問題。假如即場發現，大家有單有據就易解決問題。但如果過咗一星期先發現問題，返去舖頭想拎返啲錢都幾難。有台飲店店員投稿至「西客之道 Hispitality Secret」，表示某年新年遇到兩名野蠻客人，為追兩蚊連續兩日去店舖……
撰文：Evita｜圖片：西客之道、網上圖片
麻煩客為兩蚊追足兩日
有飲品店店員投稿至Facebook專頁，指某年年初九，有一位女客人嬲爆爆走去同收銀理論。樓主主動上前了解，而女客人就表示「你哋啲同事偷咗我兩蚊啊！」
樓主又話突然有個阿叔行入嚟拍枱：「快啲畀返兩蚊我老婆。」
女客人：「我初一喺你哋度買嘢飲啊，我話要杯奶茶佢聽錯咗要珍珠奶茶，換完杯嘢無畀番兩蚊我啊，一定係你哋同事穿櫃桶底，偷咗我兩蚊。」
麻煩客人：唔賠就告上消委會
樓主表示睇返張單，的而且確係寫住年初一，而單上只係列出咗飲品名同價錢。」於是樓主就話：
「所有找續問題都必需要喺當時提出先會有效，同埋想問點解會隔咗一個禮拜先黎追返？」
女客人：「因為我今日先醒起囉，我有Keep單㗎，我地好遠特登過黎㗎。」
女客人堅持指店員「偷咗佢兩蚊」，更大鬧唔賠就告上消委會。
然而樓主表示早前收銀收多咗人哋$400，但係客人第2日先嚟追返，所以都無賠到，希望呢位女士可以諒解。
女客人聽到後依然不斷大鬧店員人格有問題，又叫經理出嚟對質。
樓主：「唔好意思， 佢收咗工， 要朝早先喺度。」
女客人：「我住咁近一定日日落嚟追。」
（女客人一開始話由好遠過嚟，但講講吓又話住好近……非常矛盾）
網民反鬧舖頭！
到第2日，女客人同丈夫再次去舖頭，不過主任就堅持唔賠，點知第2日兩位又再落舖頭，樓主表示自己私下拎兩蚊擺喺枱面，佢哋無出聲拎完就走。
樓主大呻呢兩位麻煩客為兩蚊山長水遠走去舖頭追數，不過其他網民就唔同睇法喇。大部分網民都反鬧舖頭唔找返$400畀另一位客人，反而因為兩位客人窮追猛打而屈服，更有人要求樓主向失去$400嘅客人道歉添！
撰文：Evita｜圖片：西客之道、網上圖片
