香港迪士尼樂園連續7年虧損 勁蝕$24億！無論點做都蝕？網民拆解巨額虧損背後原因：「不如拆左佢起XX好過！」｜玩樂熱話

香港迪士尼樂園連續7年虧損 勁蝕$24億！

受疫情影響，樂園雖然己推出無薪假、減少市場推廣成本支出及取消某些季節活動等控制成本措施，但去年總營運日數為215日令收入減少，加上防疫措施的相關成本，2021財政年度虧損近24億，但較上年2020年26.6億赤字已經收窄，而本地賓客入場人次較上財政年度增長117%，年票會員人數亦增長55%，但連續7年蝕錢，實在令人擔心。

網民激烈討論樂園會唔會因為咁而關門大吉，撤出香港市場，但意見兩極。有一批啱啱買完年票嘅朋友當然希望可以玩返夠本先，千祈唔好執；亦有一撮人認為如果無咗迪士尼呢個選擇，到時要玩只可以去海洋公園。不過也有人認為，如果迪士尼撤走，地皮用作起公屋，可解決香港部分房屋問題，都未嘗唔係一件好事；但有網民覺得就算真係起都只會係私人樓，更戲言如果疫情持續，起方艙都有機會！

網民拆解巨額虧損背後原因？行政總裁：對前景保持審慎樂觀

其實2021年度蝕24億，一年有365日，除返開每日平均蝕657萬，究竟如何可以一日損失600萬？有了解迪士尼樂園運作嘅網民就話，其實因為版權問題，任何於樂園內銷售嘅紀念品，一律需要向母公司華特迪士尼繳交售價一半以上費用，而樂園收入亦要與母公司平分，但樂園所有營運龐大支出，維修及興建新設施，都要由香港公司自行支付，所以虧損數字之巨大不無道理。

在疫情影響下生意難做，但香港迪士尼樂園過去兩年樂園並無裁員，即使今年無政府的「保就業」計劃，亦不會削減員工，同時為準備樂園重開，暫時未擬再推無薪假，可見成本控制較理想，另外母公司亦提供21億元周轉信貸，以支援營運資金及業務需要。由於去年度本地賓客及年票「奇妙處處通」入場人數創新高，樂園展望4月21日重開，重點將會放喺本地客，到時會有推廣活動，而去年樂園已劃分兩種不同價格門票，因此今年內不會考慮加價。