【辦年貨】內地網站推「香港辦年貨攻略」 除咗上水 連呢啲地方都被攻陷……

撰文：Evita | 圖片：小紅書

內地網站推「香港辦年貨攻略」

平日水貨客、自由行已經逼爆香港，即將踏入農曆新年，相信香港各大適合 辦年貨 嘅地方都會被攻陷。年近歲晚，原來都有唔少網民喺網上分享「辦年貨攻略」，而其中一篇「香港上水廣場購物攻略」就成為今年陸客購物指南，內有詳細嘅行程、折扣優惠、交通提示。

最多人去嘅上水固然之會失守，但係原來中環國際金融中心（IFC）、沙田新城市廣場、連城廣場、銅鑼灣祟光百貨都受到內地客熱捧。有網民喺「百度貼吧」出post激讚IFC：「買的、吃的、看的一應俱全，無論你想入手甚麼年貨，IFC mall都應滿足你在香港的購物慾。」睇嚟今年中環上班族要應付陸客喇。

有內地網民亦喺內地網站撰寫詳細「香港年貨哪裡掃？」教學，裡面有列出六大重點，主要係教大家到沙田新城市廣場一站式購物，買傳統糖果、乾果就要到上水、元朗同屯門、就連上環海味街都係其中一個必到景點！

有內地旅行社推出5日4夜旅行團，每人盛惠3,125人民幣。旅行團行程主要包括全日迪士尼，黃大仙祠祈福、食米之蓮推薦晚餐，重點行程係去 辦年貨

。

唔單止咁，微信亦都整合出「香港春節購物優惠」，只要輸入相關字眼，系統就會回覆一連串優惠券同購物資訊。

眾多內地旅行團將會嚟香港，加上港珠澳大橋開通，內地人訪港就更加方便，今年月尾開始香港或會逼爆，各位港人不妨考慮去旅行或到較少人嘅地方吧！