直斥餐廳店員「死老豆咁嘅樣」！野蠻客稱要投訴 被餐廳經理一句K.O.｜網絡熱話
撰文：Pi｜編輯：Evita | 圖片來源：新傳媒圖片庫、劇照｜資料來源：西客之道 Hispitality Secret
野蠻客直斥餐廳店員「死老豆咁嘅樣」
有網民投稿至Facebook專頁，指自己有日同朋友去連鎖餐廳排隊落單期間，前面有一家三口（1對父母＋1個仔仔）打算食火鍋，點知搞足勁耐，仲要鬧爆收銀員添。
男客人：「要兩個牛肉鍋。」
職員：「我哋有芝士竹輪鍋同相樸鍋，兩款都有牛肉，你想要邊款？」
男客人：「是但啦，牛肉鍋就牛肉鍋啦我理得你有邊款。」
成家人不停開「家庭會議」討論！
如是者，職員幫呢家人落咗兩個芝士竹輪鍋。不過食火鍋唔係揀完就算，仲要揀埋湯底、配料同飲品㗎嘛。
店員如常地問要咩湯底同粉麵，但係呢家人不停開「家庭會議」討論，連排後面嘅客人都等到唔耐煩，忍唔住出聲叫「諗好先買啦！」隨後店員又再問要飲咩飲品。
男客人：「你問問問，問咁多問題，我要牛肉鍋你落個鍋咪得，問咩啫！」
店員：「其實落埋飲品就可以，請問你想飲咩？」
仔仔：「我要飲汽水。」
女客人：「你唔飲得啊！」
店員再次追問時，男客人就向店員大罵粗口：「你好X趕時間啊，又要問又要催！」
男客人指住店員投訴 「佢死老豆啊！」
網民表示後來餐廳經理行嚟，男客人就指住店員投訴：「佢死老豆啊，X口X面。」不過餐廳經理表示後面好多人等梗，希望客人可以落埋飲品。
男客人對太太講：「你睇下咩態度，點做經理，成間公司個個都死老豆咁嘅樣！」
經理回應：「先生，我同我同事嘅爸爸仲在生，我哋唔知咩係死老豆咁嘅樣，唔知可以點幫你，麻煩你去後面等叫號碼！」
男客人：「你叫咩名，我要投訴你，我依家唔X食喇，食唔X落呀！」
此時經理聽到並回應：「無問題啊，退返$140畀你，仲有我姓黃嘅，多謝你嘅意見，拜拜！」
有唔少嘅網民都大讚餐廳經理EQ高，亦都有網民覺得呢對父母帶埋個仔，連番粗口大鬧，根本就係一個活脫脫嘅壞榜樣。所以話，今時今日做服務性行業真係連屋企人都要被詛咒，食個飯啫，大家放鬆啲唔好咩？
撰文：Pi｜編輯：Evita | 圖片來源：新傳媒圖片庫、劇照｜資料來源：西客之道 Hispitality Secret
