飛躍道玩家跳躍南山邨 40秒由11樓跳到地面｜網絡熱話
廣告
極限運動Parkour (飛躍道) 係流行多年嘅運動，唔少人因為想挑戰自己而喺高樓大廈之間跳嚟跳去，十足十蜘蛛俠。而且香港樓與樓之間密度高，吸引唔少外國人嚟香港挑戰，日前網上就有一段飛躍道片段被擺上Facebook，位置係石硤尾南山邨，一名男子由11樓逐層跳躍到地面，實在係驚心動魄！
編輯：Evita | 圖片來源：Facebook截圖、香港飛躍道協會YouTube｜撰文：Pi
飛躍道玩家跳躍南山邨
片中男子由南山邨南樂樓頂樓開始落樓，咩安全設備都無，雖然喺樓層之間跳躍有用四肢抓住圍欄，但係差唔多落到底層時則完全凌空，睇落認真危險啊！
片中男仔只係用咗40秒左右就由頂樓落到地面，然後跑走。
其實極限運動一直以來都備受爭議，有唔少人認為佢哋「跌死都唔抵可憐」、「跳到就好型，跳唔到就玩完」等等，過往就曾經有24歲俄羅斯少女、內地知名飛躍道玩家等人因跳躍失敗而死亡，所以玩極限運動前一定要評估風險同埋接受專業訓練啊！
