清水灣大坳門生態災難 驚現七彩風箏山！山頭一日多7,80隻紙鳶原來因為一項比賽？市民：在所難免｜玩樂熱話

清水灣大坳門生態災難 驚現七彩風箏山！

講到香港最熱門的風箏場，好多人都會第一時間諗到清水灣大坳門風箏場，這裡風景既優美又開揚，放風箏就最合適不過啦！不過睇真少少，綠油油的樹林中間竟然有唔少色彩繽紛嘅斷線風箏！

山頭一日多7,80隻紙鳶原來因為一項比賽？市民：在所難免

除咗五顏六色嘅風箏，大坳門山上仲有唔少紅色紙鳶嘅蹤影，原來有一堆鬥紙鳶專業玩家經常來比賽，率先割斷對手紙鳶線的人便成為贏家，紙鳶自然就會四處飄落。當被問到風箏和紙鳶會唔會覺得影響環境，受訪市民就表示「在所難免」、「處理唔到」。

風箏殘骸遍佈大坳門，有些掛在懸崖邊，有些卡在樹枝之間，由於地理位置以致難以回收，被遺留在山上的風箏愈來愈多，除了造成環境破壞、動物誤食之外，附近的行山人士都有可能會被鋒利的風箏線割傷，都咪話唔危險呀！

世界自然基金會香港分會表示，膠製風箏是不可分解物質，然而經過風吹雨打會變得破碎，令野生動物誤食的危機更高，即使是紙鳶也會含有膠製品，線的韌度亦足以割傷途經的行山人士或雀鳥，當中的尼龍物料更容易引起山火發生，構成一發不可收拾的意外，因此大家到郊外遊玩嘅時候就要注意啦。