玩具電單車拎到牌揸出馬路被轟危險？網民鬧交：細車不可怕 無知最可怕

玩具電單車拎到牌揸出馬路？網民：細車不可怕 無知最可怕

近日於「香港炒車關注組」群組內上傳影片內，可見於觀塘鴻圖道，一部車身長不過一米嘅黃色電單車喺樓主身邊駛過，前面彎位右轉行車一直非常穩定。如果佢唔係喺路上面行緊睇落其實似俾小朋友玩嘅玩具車，樓主標題「不如再細部啲吖」。好多網友就一眼認出呢架車就係Honda Motocompo，2衝50cc，其實同好多綿羊仔類似，只係車身比較細。

有一部份網民表示呢部車好處就係完全唔需要擔心泊車位嘅問題，摺埋入電梯就可以泊係屋企；又有網民指出樓主見識少， Motocompo喺香港有一班熱衷者，合法上路又有車牌，毋需大驚小怪；更有人突破盲點指出比起小型電單車，私家車司機於駕駛中使用手提電話攝錄更加危險，罔顧道路安全使用守則。

道路安全問題惹爭議 車係咪越大越安全?

其實擺得上炒車關注組，討論嘅一大重點當然係道路安全嘅問題以及有幾大機會炒車，其中一名網民嘅觀點就惹起其他人相對激烈嘅反對意見。該留言提到如果有人將生命安全托付喺其他道路使用者手上，代表自己條命一文不值，非常愚蠢。其他網民則紛紛指出既然運輸署出牌俾佢，代表衡量過該車輛係可以安全喺道路上行走，有何來危險一辭？

識得舉一反三嘅網友就話，如果單憑用車輛大小去斷定危險與否，唔通我揸42噸貨車，其他比我細嘅車就係罔顧自己生命安全？但該名網友堅持，相比起一㗎有安全帶同氣囊嘅車，電單車的確係相對危險，但往往就有人為咗自己過癮同吸引視線要選擇小型電單車，高風險，不負責任，甚至可以話戇居！其實各方面講嘅都有多少道理，但講到人身攻擊相信係其他網友睇唔過眼嘅地方。