網民鬧爆：不知所謂！ 準港姐陳苑澄爆喊道歉解釋跟風玩Kiki Challenge原因！
撰文：東方新地｜圖片：新傳媒圖片庫、Instagram｜編輯：CC＠Central(原文刊於《東方新地》)
準港姐陳苑澄爆喊 六度道歉
今午，今屆20位佳麗到銅鑼灣一間化妝品店進行宣傳，陳苑澄（Tania）因拍攝「Kiki Challenge」影片，而成為被訪焦點所在！不過，Tania似乎有備而來，一接受訪問即爆喊，期間更多次轉身抹淚，六度講「對唔住」並向鏡頭鞠躬！
Tania於訪問中，承認自己拍片係輕率，指：「冇諗過後果，令到觀眾有咁大抨擊，對唔住。我罔顧咗安全，自己係有疏忽，對唔住。」至於有冇俾TVB照肺，佢坦言：「監製何小慧有搵我傾偈，討論點去處理件事，因為始終有影響，畀咗我好多意見，依家係一個好好懺悔嘅階段。」
事件引嚟全城關注，當被問及有冇被勸退選，Tania就話：「冇，好對唔住，令大家有咁多抨擊，當時冇諗咁多。」
Tania亦未有正面回應擔唔搶心負上法律責任，只話：「好對唔住，對年青人做咗個非常唔好，好壞嘅榜樣，對唔住。」仲話自己因第一次面對咁嘅情況，所以由尋晚開始諗點回應呢件事，同時表明希望公司及大眾原諒。訪問完結後，Tania再講多次好對唔住。
雖然未知事件會唔會影響到Tania嘅選情，不過佢講足6次對唔住，唔知大家又收唔收貨呢？
準港姐陳苑澄挑戰Kiki Challenge
前組合As One成員陳苑澄係今屆候選港姐，曾講過參選港姐係想挑戰自己，原來佢真係好鍾意挑戰！日前，Tania喺個人社交網分享一條短片，片中Tania又露腰又晒腿，原來係挑戰最近新興嘅「kiki challenge」！片中可見，Tania落車一邊跳舞，一邊跟住架行駛中嘅私家車！
片中，Tania除咗露腰又晒腿之外，佢仲伸手入車廂攞彩帶，無視途人，邊行邊表演絲帶舞！之後，佢仲將手中嘅彩帶隨手就當垃圾拋下。
之後，佢仲表現踢腿、提腿等高難度動作，係就係好吸睛嘅，但就好似妄顧途人嘅安全，皆因無論係行人路定行車路都可能隨時會有人或車，萬一一個冇留意，就會發生不必要嘅意外。
表演完嘅Tania就上番車，仲對住鏡頭嘟嘴兼畀心心，完全唔覺有咩問題。
遭網民鬧爆
短片一出，有唔少網民對陳苑澄呢個挑戰「kiki challenge」行為表示反感，有網民仲用粗口留言鬧佢，認為此舉不知所謂因會危害其他途人，亦有網民話佢「扮可愛定係真低能？」
除此以外，亦有其他網民指拍片者危險駕駛，又話Tania亂丟垃圾，笑指可以告得入。
藝人網紅紛紛挑戰
不過，原來唔止陳苑澄拍「kiki challenge」短片嘅藝人，另一位As One前隊友陳嘉茵都有挑戰過，連網絡紅人丁可欣（火雞姐）都有跟風拍過條短片！
何浩文睇唔過眼
憑住擔正主演電影《鴨王》而為人熟悉嘅藝人何浩文（Dominic）曾喺個人社交網發文，指大家唔應該跟風拍片挑戰，更指明特別係藝人，因為會影響到年輕人，坦言若不幸有人發生意外，就變成間接令人受傷嘅主因。
咩係Kiki Challenge？
可能唔會個個人都知咩係「Kiki Challenge」，其實呢個係由外國發起嘅短片挑戰活動，亦名「In My Feeling Challenge」，源自IG Comedian The Shaggy Show自拍咗段跟住《In My Feelings》呢首歌自創嘅舞蹈，其後成一股風潮。冇耐，就升級成要人由移動中嘅車輛開門出去，一邊走一邊跳。其實呢啲都係好危險嘅行為，大家唔好亂咁嘗試！
陳苑澄 表演一字馬
23歲陳苑澄(Tania)喺2012年加入As One前已經好多才多藝，曾經係香港藝術體操隊成員，參加過唔少公開表演。
原來佢由6歲小學一年級就開始學習藝術體操，難怪可以輕鬆做出一字馬嘅動作！
除咗練習體操，Tania近日仲苦練緊歌藝，唔知係咪會喺港姐才藝表演項目上演出呢？
前隊友齊慶祝
Tania喺As One時英文名叫Nata，除咗係副隊長之外，仲負責主領舞同領唱，直到去年2月，因為同太陽娛樂解約而退出組合，但佢同另外兩位前組合成員陳嘉茵(Kayan)、蘇皓兒(Chloe)仍然好friend，日前仲喺街頭合照，慶祝各自喺娛樂圈取得好成績。
大肆慶祝 @chloe_so 成為廣告女皇 大肆慶祝 @hahakayanc 首大肆慶祝成為903專業推介第二位 大肆興祝 #2018MissHK #Training 開始 #❤️
Tania Chan 陳苑澄（@taniachanyc）分享的貼文 於張貼
As One在2016年全盛時期，成員有下圖左起的Chloe、Tania(前名Nata)、Shin(吳思佳)和Kayan。
離開As One後，Tania在大學修讀心理學，佢話已經休息咗一年，因為仍然好鍾意唱歌跳舞，所以今次決定參選港姐，再戰娛樂圈。
