關愛座爭議無間斷 九巴首度開腔回應：「有需要就可以坐」
撰文：Evita | 圖片：KMB九巴專頁
九巴首度開腔回應關愛座使用權
昨日九巴首次喺Facebook專頁公開解釋關愛座使用權，九巴指：「關愛座嘅原意就係讓畀有需要嘅人坐，不論係身體唔舒服、長者、孕婦、抑或殘障人士等等。」
九巴又話：「大家有時候都會有身體唔舒服想休息嘅時候，肉眼睇唔見但唔代表佢無需要㗎。如果咁啱無人需要坐，大家其實坐下都無問題㗎」
九巴指關愛座係有人有需要就可以坐，仲hashtag 寶寶很累但寶寶不說、相嗌唔好口等。不過此圖一出就引來百幾個網民留言，部分認為應取消關愛座、關愛座已經變為批鬥座，無咗本來嘅原意。
相關文章：
學生讓關愛座仍被大叔責罵
其實關愛座問題多年前已經存在，網民之所以咁大反應，全因愈嚟愈多因為關愛座爭執嘅個案發生。就好似日前有網民喺Facebook分享朝早搭車返工時，除咗兩個關愛座之外就坐滿人。後來有個背住書包嘅學生上車，樓主指：「眼見書包重量唔輕，可能佢只坐幾個站，而當時又無有需要嘅人要坐，佢就坐咗外面個位(關愛座）。」
樓主稱巴士駛到下個站，有幾名乘客同中年男人上車，學生哥即時起身企喺近落車門口，點知中年男人依然唔放過個學生，大聲話：「你坐㗎咩！呢個係關愛座，唔係畀你坐，你有無我咁大年紀啊？」
樓主續指中年男人繼續鬧個學生時，車長突然講：「個位人人都可以坐。」點知男人話：「呢個係關愛座。」車長又再回應：「關愛座係優先讓畀有需要嘅人，無寫你個名，唔一定係你坐。」最終男人無聲出。
網民對呢件事就有以下回應，指關愛座應該取消，並話個男人見到對方係學生先夠膽恰！
阿伯要求讓出關愛座
早前又有網民在「奴工處」Facebook專頁投稿，指自己乘港鐵時看到有個年輕男士坐關愛座，不過就一直低頭。後來有位伯伯上車叫該名男士讓座，男士抬頭時雙眼發紅：「我份工企咗成日啦！」怎料伯伯以：「後生仔企下無所謂」作回應。
後來男士說：「成個新年無放過假阿X！」不過伯伯依然你有你發牢騷，我有我要求坐，之後旁邊的女士讓位給伯伯。
有網民就在此貼文下面留言，直斥「老唔係大晒」、「後生返足全日工都想有位坐吓」、「關愛座又名分化座」等。
呢兩位網民分享自己懷孕時被長者要求讓座，其中一位網民更被指扮大肚。
不單止以上的網民經歷，更早前還有另一位網民投稿至同一個Facebook專頁，指自己平日會調景嶺往荃灣上班，除了關愛座，看到有位都會坐。
樓主分享有日上班時如常找到座位，打算藉車程再補補眠，怎料去到九龍灣站時，樓主突然被身旁女士拍醒。女士指住一位剛上車的嬸嬸，再叫樓主讓座。此時嬸嬸有禮貌地稱自己很快下車，叫樓主休息多會兒。
最後樓主都讓座給嬸嬸，不過樓主就指不明白為何身旁女士自己不讓出座位，如常用電話煲劇以及叫醒他人叫人讓位。
網民都看不過人，認為該名女士應該自己主動讓座，叫樓主應該「拍返佢轉頭」。
其實優先座原意是讓有需要的乘客使用，不過有網民就認為有部分老人家倚老賣老，有人則未老扮老，優先座又係咪真係能夠發揮其功用呢？定係只係一張令人累都唔敢坐嘅「批鬥座」呢？
