酒店職員帶客人參觀房間時疑似撞鬼！電視機開到好大聲＋一開門見人影閃過
酒店職員帶客人參觀新房時疑似撞鬼
最近有酒店職員在Facebook「巴打絲打11鬼故台」發文，表示近日在打工的酒店疑似遇到靈異事件。事主表示酒店之前有重新裝修過某些房間，而營業部的職員亦會邀請客戶去酒店睇房間，「雖然話係安排畀客睇新房，但如果撞正旺季就未必可以留定一間房嚟做固定示範單位，所以有時會等check out咗執好房先會安排帶客睇」。
房裏傳來玻璃杯敲落枱的聲音
事主當日帶客人去酒店新房門口，他有㩒門鐘和敲門才拍卡開門，怎料他打開門的時候，聽到房入面有像玻璃杯敲落枱的聲音，不過他見到門口的門鎖已經顯示綠燈可以進入，所以反應不來順手推開門，「我哋一開門入去，就見到有個人迎面而嚟好快就轉咗入廁所。嗰陣係中午，間房冇落窗簾，有少少陽光，所以都幾肯定見到係有人。我即刻話Sorry唔好意思！就同我個客一齊出返去」。
職員和客人十分驚嚇
職員和客人都十分驚嚇，無想過房間入面仍有客人，所以職員告知大堂經理，讓經理處理剛才的意外，「我打畀大堂經理，『你哋開畀我間房，原來有客喺度未走呀，你再開過一間畀我啦』，我一路留意住如果間房個客出嚟，我都再同佢講聲唔好意思，因為係我哋酒店唔小心搞咗房間號碼，但都一直唔見有人出過嚟」。
無人但電視機開到好大聲
其後職員送客人離開後，大堂經理就對職員表示剛才的房間入面根本沒有客人，並坦言他們可能撞鬼，「我哋今次瀨咗嘢啦！日光日白都咁猛嘅，間房冇人住㗎！對上個住客已經喺前一日晨早退咗房，我哋知你帶客嚟睇房，清潔好曬之後就冇再安排畀其他客入住。頭先同個同事行到嗰間房門口，就聽到入面電視機開到好大聲，又敲門又㩒鐘都冇人應門，開門入去，見到電視機開著咗，轉咗去唔知咩台兼且較到好大聲，但間房冇人嘅」。
經理一句話肯定職員是撞鬼
事主覺得超心寒，更指當時自己和客人都見到有個人轉右行入廁所，經理指肯定是撞鬼，更點出當中奇怪之處，「嗰間房右邊係衣櫃位嚟㗎！左邊先係廁所，間房又唔係大，睇過晒冇人㗎！」，其後事主才醒覺雙數房間左邊是廁所，單數房間就右邊是廁所，「嗰間房係雙數嚟，咁即係嗰個人影係行咗入右邊個衣櫃度⋯」，不少網民紛紛留言，「正常廁所門同衣櫃門應該唔同樣，個下應該已經要知咩事」、「都幾恐怖！好彩個客人唔知係鬼」。
