入住荃灣某酒店疑撞鬼 網民：鬼壓床、朋友Feel到有靈體

撰文：CY｜圖片來源：unsplash、香港討論區、《愛回家之開心速遞》｜原文刊於：GOtrip

網民去荃灣酒店過夜撞鬼 鬼壓床仲睇見有靈體 留言狂估邊間酒店

早前，有網民於香港討論區以「去荃灣某酒店staycation撞鬼 被鬼責 廁所水自動沖」為題，發文分享日前酒店入住經歷，指自己與2位朋友入住一間荃灣酒店打算玩兩日一夜，結果卻變成驚魂夜，真係相當嚇人！

事主分享，自己剛入房間已經感到房間有異常。「一入到房冇耐我已經耳鳴 ，然後有少少頭赤赤，以為自己感親，都冇咩理。」然而，在深夜時分，在事主快將入睡時，他突然感到有「人」在房間內不斷行走。「然後feel到有嘢壓落我身體，我完全郁唔到。」事主稱，當時自己半邊身麻痹接近5分鐘，想叫都叫唔到！

然而，事件仍然未告一段落。事主話被鬼壓的同時，忽然聽到廁所傳來沖水聲。「望一望個鐘，5點3，身邊兩個朋友仍然瞓到豬頭咁。」嚇到事主即刻用被蓋住個頭等天光。「之後我都唔敢再瞓番。」直到離開酒店，樓主向身邊友人分享經歷，友人才透露其實一早已經感覺有古怪。「Feel到間房有一大一細嘅靈體，不過佢哋只係好奇冇惡意，話我因為時運低先咁喎！」

究竟邊間酒店咁猛鬼？除了在標題透露酒店位於荃灣，事主更畀足線索，話：「間酒店超高，房間用色好暗。」「冇記錯係分咗兩座，一座矮一座高。」加上荃灣酒店其實並不算多，各位網民好踴躍回覆猜測酒店名稱。雖然事主直到最後都未有透露酒店名稱，不過似乎仍然無法撲滅網民們的熱情，依然估得相當熱烈。大家又覺得是哪一間酒店呢？

精彩網民留言

資料來源：香港討論區「去荃灣某酒店staycation撞鬼 被鬼責 廁所水自動沖」

網民原文

唔開名唔出相，不過我畀少少tips大家都一定知
我諗大家都估到啦

上星期就同2個朋友去左玩兩日一夜
因為間酒店其實係氹氹圈設計
所以冇所謂尾房，不過酒店當日就安排左Corner房畀我地
大啲仲有一個好大嘅落地玻璃，景好靚
但係一入到房冇耐我已經耳鳴，然後有少少頭赤赤
以為自己感襯，都冇咩理

我地個晚玩到3點幾大家就瞓教，兩位朋友好快就瞓著
反而我就瞓唔到，而且成日FEEL到好似有「人」喺間房行黎行去
喺我差唔多瞓著，半夢半醒之際我忽然一邊身麻痺咗

然後FEEL到有嘢壓落我身體，我完全郁唔到，耳仔聽到好多人講野
啲聲係鬼食泥咁款「errr….. wa…..」，但個陣我完全郁唔到
想叫又叫唔到，都維持咗呢個狀態起碼5分鐘
忽然間，個廁所沖水啲沖水聲令我成個人醒左
望一望個鐘，5點3，身邊兩個朋友仍然訓到豬頭
究竟係邊個沖廁所？但我肯定冇聽錯
因為沖完廁所，係會有半分鐘至一分鐘嘅去水聲
之後我都唔敢再瞓返，用被蓋住個頭等天光
Check out 同朋友講返呢件事個陣
其中一個朋友話其實佢FEEL到間房有一大一細嘅靈體
不過佢哋只係好奇冇惡意，話我因為時運差先咁喎