港媽入迪士尼餐廳等位被打尖 嬲爆大鬧對方用靈魂嚟霸位：人無恥果然係無敵

港媽入迪士尼餐廳等位引起罵戰

有網民在Facebook「生仔要考牌系列」發文，事主最近在迪士尼的餐廳食飯等位時，終於等到前一檯的人準備走之時，後面突然有一名男人走上前表示自己都等緊同一張檯。對方指「呢張檯我都係等緊㗎」，事主出聲爭取，但對方卻說「我帶住小朋友喺呢個area已經等咗九個字，所以呢張檯係我嘅」。

大鬧對方用靈魂霸位

事主大呻超無奈，「我真係而家先知原來已經進展到可以用靈魂嚟霸位，最後我好無奈，因為自己嘅長輩話今日嚟玩唔好同人嘈」。最後事主將檯讓出，「唔知呢條友係咪個靈魂有殘缺，咁都要等九個字先搲到張檯返嚟，人無恥果然係無敵」。

網民批評迪士尼餐廳無效率

有網民覺得迪士尼的餐廳安排好差， 等位、排隊、取餐等都好無效率，「所以我決定唔再去迪士尼，又或者買飯團入去食就算， 唔好勞氣」、「好多男人都好老土，等位好興企一個位但附近全部都係佢等緊，food court見唔少」。有網民建議樓主去酒店食差唔多價錢仲舒服，「根本迪士尼冇準備咁多人食嘢，反觀海洋公園最近去，多咗好多食店，價錢都平過迪士尼」。

網民：人無恥果然係無敵

有網民指之前都試過同樣情況，「好X憎呢啲人，你話你等緊又唔早講，到有位就走嚟話等緊，然後我一早企喺個位成三個字，都冇人走嚟出聲話佢等緊」。另有網民食花生留言，大讚樓主以「用靈魂嚟霸位」好正，「呢句嘢真係好正好到point，直頭可以納入今年潮語」、「其實如果佢話，唔好意思，我同小朋友等咗好耐，小朋友好肚餓，唔知可唔可以讓比我哋，我食完好快可以比返你你，我會讓畀佢」。

網民反鬧事主懶好人！

「你咁好人，我都會要你個位啦」、「咁都係人地早等過妳」、「你自己吾同人嘈，怪邊個? 比我吾會讓，話之佢用寃鬼黎排隊。我自己最少吾會氣頂到出post」。

原文截圖：

資料來源：Facebook@生仔要考牌系列授權