港男玩迪士尼小小世界疑似撞鬼 事主嚇怕：轉個彎成架船消失咗｜玩樂熱話
廣告
經常聽到網民話去迪士尼玩小小世界，覺得好恐佈，有時都幾陰暗，令人覺得有點可怕，最近有網民就分享一次玩小小世界的經歷，搭搭下船前面的情侶突然消失，事主坦言經過此事後不敢再入去小小世界玩。
港男玩迪士尼小小世界疑似撞鬼
最近有網民大爆自己疑似撞鬼的親身經歷，樓主表示一直覺得迪士尼小小世界好恐怖，疫情期間事主與女朋友因為經常行街行到冇地方去，所以決定買迪士尼年卡入迪士尼玩，「入到去就好少人，好多機動遊戲都唔使排隊，基本上去到就玩得，咁我地玩到咁上下就諗住去小小世界坐下」。
事主：轉個彎成架船消失咗
去玩小小世界途中，事主見到前面有一對情侶，其中男生是穿著黃色衫，「我地就跟住對情侶，入到小小世界上架船，我地就上佢地後面個架船，影下相，吹下水，都冇乜留意前面啲人。之後去到有個位係轉右，係維修保養船隻遊客冇得入個啲位嚟嘅，我地就係呢個位前面個彎，我地一轉完個彎就唔見咗前面個對情侶，就連架船都唔見咗」。
維修區閘門明明關咗
事主表示前面有一段距離是有架船坐住一家三口，「我地經過埋維修個個位，道閘係閂埋咗。我出到去問下我女朋友記唔記得前面係咪有對情侶著黃色衫，佢都話記得，上船個陣仲望咗眼，認錯顏色應該都冇可能，我地喺出面都見到係黃色，仲跟住佢地入去小小世界」。
事主直言唔敢再入去小小世界玩
事主表示諗極都唔明，為何前面黃衫的男子會突然駛去維修區，唯一解釋是對方是工作人員，「但係冇理由會阻住後面遊客嘅情況下入去維修，而且都冇著工作人員嘅衫，呢個答案都係唔知道」，事主直言經過那次後，不敢再入去小小世界玩，「驚唔知會唔會變下一個公仔」。
圖片來源：tokyodisneyresort
