辭職後老細發癲！網民熱議遞信後上司反常行為 竟然動粗？！｜網絡熱話

上司突然約食飯 巴打大呻：辭職後驚佢發癲

有網民於連登以「有冇試過畀辭職信後上司發癲」為題出post，分享自己辭職的經歷。當中講述自己上司早幾天前已察覺到他有辭職的念頭，於是專登請他食午飯，用餐時更表示若有任何意見都可以主動提出，又指覺得事主會一直做落去，更大讚他很有熱誠！但其實事主已經準備下星期會遞信辭職，同事知道之後就提醒他小心上司得悉後會發癲。此post一出就引來熱烈討論，好多巴絲打都一齊分享遞信辭職後上司發癲的經驗。

辭職後上司4大反常行為

1. 得悉辭職後黑面發火

有一位巴打就話，好多年前打工，返咗幾日已經不停OT，覺得不大對路。返工幾天後收到大公司的offer，於是就同上司坦白講自己已有offer想辭職，誰料老細即刻變面，發火拍枱，更將文件掃落地下，出言侮辱巴打指他「成世都唔會出頭」、「好冇用」之類，問：「你當我呢度係跳板呀？」隨即要求佢拎支票及立即離開，後來巴打發現老細冇計到OT錢！

2. 通知期內不斷改更表

有另一位絲打就話，公司需要一個月通知期，上司於她辭職遞信後的一個月內將更期改到不知所謂，而絲打見狀決定最後2日上班日都「射波」。其後上司將絲打某一個月糧轉做支票，要求她交病假紙換支票，絲打表示根本沒有想過要交假紙，加上該月的糧都只係得一日，所以沒有看醫生，索性「豪比佢」。

3. 寫花reference check

亦有另一位巴打指，於舊公司升職半年後辭職，上司知道之後即時態度轉變，更將巴打的reference check寫到好差！好在新公司的HR同上司都理解及體諒，並沒有因為reference check而不請他。

4. 動粗用筆掟人

除了黑面鬧人之外，最誇張是用筆掟人！有巴打就指雖然老闆沒有發癲，反而是深得老闆歡心的「黃馬掛」動粗用筆掟佢，只是辭職而已，真的需要動武嗎？

辭職時其實唔洗驚

見到眾多留言，有準備辭職的巴打都表示有啲驚，不知道到時上司會做啲咩。其中一個巴打就話其實自身有能力有料的話根本不用怕，直言「東家唔打打西家，如果上司無理取罵，就話返佢轉頭，反正都唔做。」不過編輯覺得正所謂凡事留一線，日後好相見，就算上司點無理都好，最好冷靜處理！

資料來源：連登討論區