車中泊露營KOL帆布袋掛車門網民怒指危駕隨時害死人！主角親身回應原來做緊好事？｜玩樂熱話

Q: 事主回應原來在做好事？

事主指他原來是在... 詳情

Apr 7 2022

由於疫情關係香港人少咗去旅行嘅機會，於是喺香港捐窿捐罅，好多人仲將自己嘅愛車改裝成入面有齊臥舖同簡單煮食用具嘅露營車，方便四周圍去玩，稱為「車中泊」。日前有一個車中泊媽媽KOL被發現喺行車時將垃圾掛於車門，引起網民熱烈討論，事主更現身說法，但網民對於解釋唔收貨之餘仲質疑除左掛喺車身其實有好多選擇，但事主對道路毫無意識，萬一膠袋掉落下釀成意外將會非常危險！

車中泊KOL帆布袋垃圾外掛車門？好心做壞事主角親身回應

早兩日有網民喺Facebook「馬路的事討論區」上載一張相，顯示一架於隧道中行駛嘅車，右邊車門綁住咗一大一細2個疑似垃圾袋，仲話「某露營KOL，Fing下 Fing下，睇見都心寒」。眼利嘅網友一眼就認得出車主，揸開車嘅網民第一個反應就係啲袋會遮住右側鏡嘅視線，對駕駛者本身構成一定危險，另外啲袋掛喺車門如果跌向後面車輛更會釀成意外。

有認識該位KOL嘅人通知佢，於是立刻留言解釋當日佢去欣澳玩，見到有人隨地掉垃圾，於是同朋友一齊執好之後放入個袋入面，諗住拎出去掉，但係沿途都冇見到垃圾桶，而且一出欣澳就上咗公路，雖然知道咁樣掛係危險，但只係「想為環境做返啲嘢」。大部份網友對佢呢個解釋都唔收貨，指出其實佢唔係第一次咁樣做，有去過車中泊露營場嘅朋友表示，呢位KOL亦都有教過佢將垃圾掛喺側鏡自己揸出去掉！

車中泊部份網友對佢呢個解釋都唔收貨，指出其實佢唔係第一次咁樣做 — 部份網友對佢呢個解釋都唔收貨，指出其實佢唔係第一次咁樣做（圖片來源：FB@露營寶寶。車中泊。親子遊）

網民：危險駕駛點解唔放係XX？

其實網民唔收貨最大原因係，KOL以環保為名自私為實，如果真心為咗環保而執垃圾，大可以喺欣澳搵垃圾站，即使搵唔到垃圾站，亦都可以將垃圾分批放入街邊垃圾桶，而唔係罔顧其他道路使用者嘅安全掛係爬架。再者其實車頂有行李架，大型件本來就應該放喺上面再加上行李帶紮實，點解唔將袋垃圾放喺頂架？一定安全過掛喺側邊。說穿了其實就係又要帶光環，又要怕麻煩。