阿婆超市偷嘢斷正！路過港女反鬧職員兼投訴「咁多人恰老人家係你哋唔啱！」｜網絡熱話
廣告
無論在超市、任何地方，偷嘢都係刑事罪行，然而有唔少人斷正時都會以「唔記得咗畀錢」為理由，以求放開一命。早前有超市職員投稿至「西客之道Hispitality Secret」Facebook，表示多次捉到同一個阿婆偷嘢，阿婆每次都話唔小心，最終仲要⋯⋯
撰文：Evita | 圖片：劇照、新傳媒資料室、西店Hi客之道 Hispitality Secret
阿婆超市偷嘢斷正
早前有超市職員投稿到Facebook，指第三次捉到同一個阿婆偷嘢，今次同經理都決定報警處理。職員表示阿婆被捉到後話自己真係唔小心。
職員：「唔好再扮嘢啦，我已經捉咗你兩次啦，我係唔會可憐你㗎！」
阿婆：「救命啊，有人蝦阿婆啊！」
職員話之後有個富有正義感嘅女人出現幫阿婆，問婆婆發生咩事，又問職員咁多人圍住一個阿婆做咩。點知阿婆又話乜都唔知，更話自己無偷嘢。
經理：「嗱！呢位小姐，我哋就捉到呢個阿婆喺到偷嘢！」
女人：「咁你哋有無證據啊？唔可以咁多個人一齊喺到屈一個阿婆囉！」
職員：「係我捉到佢偷嘢，我哋有晒CCTV，同埋我哋已經報咗警！」
女人：「總之你哋咁多個人一齊圍住個老人家就係你哋唔啱啦，婆婆唔使驚我哋一齊等警察嚟！」
職員表示警察嚟到後都已經認得個阿婆，而個女人就同警察講成班人屈阿婆偷嘢。
女人：「人哋都咁大年紀啦，你唔會老嘅，將心比己啦你想人地咁大年紀仲要坐監咩？」
最後職員同警察講，懷疑呢個女人都係同黨，於是女人同阿婆都要接受調查。但係隔咗一個月之後，超市就收到投訴信，指職員們對年老嘅客人無禮貌，又恐嚇客人。
網民笑港女扮「正義」
網民睇完呢件事之後都話呢個女人唔係正義，而係無知，有人又話好多老人家都係超市慣犯，經常恃老賣老。大家又點睇呢件事呢？
撰文：Evita | 圖片：新傳媒資料室、西店Hi客之道 Hispitality Secret
