買花講價不果發爛渣女子揮摺櫈大鬧花檔

Feb 8 2019

3日年假過後，又到開爐嘅日子喇，先祝大家開工大吉！相信有唔少市民過年時都會買鮮花去布置屋企，而大年初二當日就有網民上載一條影片到Facebook，片中見到一名中年女子喺牛頭角大鬧賣花檔，而魚販出聲理論嘅行為更獲廣大網民支持啊！

女子買花講價不果揮摺櫈

大年初二當日，正當人人都忙於拜年時，有位網民就喺Facebook群組發布兩條影片，指事發當日朝早11點幾，一名中年女人去牛頭角街市門口買花，要求年老嘅店主以低價賣花不果，女人就情緒激動將裝鮮花嘅水桶亂掉，場面非常混亂。

喺影片中見到鮮花散落一地，身穿灰白色格仔恤衫嘅老年男人疑似係花檔店主，不停執返好地上嘅鮮花。魚販就話：「唔好恰老人家」，而中年女人就話：「我嚟買嘢佢唔賣畀我」。

隨後該名中年女人拎起摺櫈想掟向魚販，結果被對方搶走。

之後女人拎起一束鮮花離開，魚販同拍片者就一直追趕，更話已經報咗警，但係該名女人完全無理會，喺馬路上行走過對面嘅便利店。

之後中年女人將鮮花掉落地，同時警察都到場，女人就話：「講下啫，會畀返錢」。

影片擺咗上網後引起大批網民留言，大部分人都大讚魚販好有型，仲話應該要告個女人刑事，大家又點睇呢？

關鍵詞