親戚飲茶奉旨唔夾錢！後輩唔埋一次單反被鬧：唔識人情世故｜網絡熱話
廣告
同親戚飲茶叫返一盅兩件本身係一件開心嘅事，燒賣、牛肉球、鳳爪⋯⋯邊食邊傾計好relax，但係如果每次飲完茶都係你埋單就唔係咁講啦！有位廿幾歲嘅網民喺連登大呻自己親戚無恥，指每次飲茶都好似奉旨要埋單，搞到樓主勁嬲啊！
無恥親戚食飯奉旨唔夾錢！
有網民以「有一種親戚叫無恥」為題，於連登討論區發文，指每一次同親戚飲茶，到結帳的時候個個都只係拍拍屁股就走。而樓主媽媽就為免大家尷尬，總會叫樓主畀錢，但親戚從不會主動夾返錢。樓主表示之前都埋咗八、九次單，心有不忿，因此決定是次食飯不會再埋單！
網民決心唔埋單 直接走人
到咗當日最重要嘅埋單時刻，樓主打算唔畀錢就走，點知有個親戚好大聲咁講⋯⋯
親戚：「你未畀錢呀！」
樓主聽到即刻勁嬲，心諗親戚又係想自己請，所以扮聽唔到就走。
親戚反罵不懂人情世故
點知班親戚當晚打畀樓主⋯⋯
親戚：「你今日做咩唔畀錢就走咗，你知唔知你咁好無禮貌？我唔理啊你點都要夾返錢，你都咁大個人啦應該要知呢啲人情世故，你知唔知啊，我教精你！」
而樓主就話唔明白點解仲要煩住佢，今次張單唔使一千蚊，之前又唔見班親戚主動話夾返錢，簡直無恥到極啊！
有網民就話下次應該「唔好再去」，同時提議樓主應該同親戚講：「上次幾餐你哋好似都未夾返喎。」更加有網民嬲爆，覺得應該要班親戚認做乞衣。
埋單一次半次無所謂，不過係咪應該公平啲，大家請吓大家，又或者夾錢咪食得開心囉。
撰文：Pi｜圖片：新假期圖片庫、連登討論區、《愛回家》劇照
圖片來源：新假期圖片庫、連登討論區、《愛回家》劇照
