見工畀人狂踩！網民力數HR為難經歷：面試即場壓10K、連fresh grad都要求1年經驗｜網絡熱話
廣告
相信唔少人都有見工經驗，好嘅公司固然多，但當中不乏唔少態度差、故意為難求職者嘅 HR 或者老闆，有網民就分享「見工俾人踩到一文不值」嘅經驗，即刻睇下有無共鳴！
撰文：熙燈喱｜圖片：劇照｜資料來源：連登討論區
6大過份行為！見工畀人踩到上心口
1. 拖延時間無預備
好多公司約某個時間見工，都會要求求職者喺門口填表、坐低等下咁，呢位網民就話試過畀人叫去見工，但對方係面試前無睇過 CV，直接話無經驗就趕自己走。咁又何苦要叫人特登去面試呢？
2. 即場壓價 要求轉職位
有唔少公司都明知自己開唔到預期薪金（expected salary），都希望見一見求職者再壓價。而呢位網民就誇到即場畀人壓 $10,000 人工，或者轉做唔同職位先畀到相等人工。如果一早就無諗住畀到預期薪金，點解仲要故意為難人哋？
3. 完全唔尊重求職者
見工中有對答好正常，但一般用英文講完，就唔會要求用中文講多次（前提中文為母語），但呢個面試官就完全唔聽人哋用英文 present 嘅內容，直接要求以中文翻譯多次，come on，留心啲！
4. 狂做 skill test
見工前要做少少 skill test 非常合理，以免發生請番嚟嘅人根本唔識做。但呢位網民就分享自己淨係做 test 都搞咗 3-4 個鐘，直情當佢係公司正式員工咁做！
5. 啱啱畢業都要求經驗
Fresh Grad 無經驗好正常，但唔少公司又寫歡迎畢業生，同時又要求對方有 1-2 年工作經驗，喂大佬，返學點樣變 1-2 年全職經驗出嚟啊？
6. 不停搵你缺點 故意為難
最多人就係話，對方不停搵唔關事嘅嘢為難自己，似乎係返得唔開心就要踩吓人搵樂趣。網民甚至分享自己已經大學畢業而且做咗幾年嘢，仲要拎番會考某一科成績不停講。
又有網民話見工個陣，畀人查家宅！兩老健康，無兄弟姊妹就話人無經濟壓力，好易唔做，網民大呻：「係咪幸福家庭都要畀佢踩啊？」
網民教路：見工唔係求佢畀你返
有不少網民都認同，見工其實係雙向。你求職的同時亦觀察公司的氣氛環境、員工工作態度等，如果喺見工時已經不愉快，相信入到去做只會更難捱，求職同樣要學識 say No。
撰文：熙燈喱｜圖片：劇照｜資料來源：連登討論區
