港女行山被黑蜂蟄傷打去政府熱線投訴！網民怒轟白痴｜玩樂熱話
廣告
天氣秋高氣爽，不少市民都去行山感受秋涼。近日有一名女網民在Facebook群組「香港行山新手交流區」上分享，自己與朋友在行山時被黑蜂蟄傷，故此向政府熱線1823投訴，但就被網民怒轟白痴「喺黑蜂屋企投訴佢哋，咩玩法？」，更擔心此舉會令黑蜂受到「滅族」的對待。
港女行山遭蟄傷 打1823投訴山上有黑蜂
日前女網民在Facebook上發帖，表示「大家留意，我今日去行老人山，途中突然被十幾黑蜂圍，及刺咗一口，超級痛」，更指「 之後亦有行山友被刺，我知道至少7個人，至今仍然痛，需要看醫生」。於是隨後向政府熱線電話1823投訴，並呼籲網民廣傳山上有黑蜂的消息。
網民怒轟白痴：嗰度黑蜂屋企嚟！
事件之後引發網民熱烈討論，山友對投訴的行為有保留，認為對方身處郊外野生環境「山上有蜜蜂等昆蟲不是很正常嗎？」、「投訴在郊野有蜜蜂針人，有趣！」、「行山遇到黑蜂都要投訴？係唔係有病呀？」、「果然係投訴之都」、「咁黑蜂應該向邊個投訴？」、「真心建議樓主留在家中」，並質疑這是濫用投訴服務，有機會令政府作出消滅黑蜂的措施，破壞自然生態平衡。
其後女事主再為投訴行為解畫，表示「針傷行山人士就可以投訴，等於馬騮和野豬問題，如果無人投訴，就無人理」、「打1823，由佢哋諗，邊個部門負責去處理」，堅持投訴行為並無不妥。網民又再度被焫著，怒轟「黑蜂先係原居民，咁樣同殺野猪冇分別」、「行山人士先係入侵者」、「咁有冇野豬馬騮投訴你生存在呢個世界啊？」網大家又點睇呢？
圖片來源：Facebook@「香港行山新手交流區」、香港旅遊發展局、IG@ansonlht、新假期編輯部、ViuTV《美女郊遊遊》截圖、TVB《愛回家之開心速遞》截圖
