港人最憎臭屁蟲成珍品　網友：用嚟補腎做真男人

當地人就表示，臭屁蟲有特別功效，對男人尤其有益，因為可以補腎。食完成個男人都翻返嚟，意氣風發咁話。仲話用椒鹽嚟爆炒味道一流，煲湯都十分惹味。形容為「椒鹽臭屁蟲最好吃了，特別是用來做下酒菜，又香又脆！會夜尿的小孩子吃這個最合適了。」

其實內地食嘢除咗奇怪、噁心外，仲好殘暴。有另一個補身嘅菜式叫澆驢肉，做法十分殘忍。首先將活驢固定好，將食客指定嘅某一部分剝下驢皮，露出鮮肉，再用滾盪嘅老湯淋塊肉，等到肉熟咗再割落嚟，裝盤上碟。

因為臭屁蟲尿液有毒，受驚時亦會噴射出毒液，農民表示接觸到眼睛會「火辣辣的疼，嚴重的還會得角膜炎，必須立刻去醫院治療。」接觸到皮膚則會「立馬會腐爛！」所以處理臭屁蟲嘅做法需要十分小心。

東莞人會先將臭屁蟲倒入40至45度的暖水「排尿」。當臭屁蟲死咗就去除所有尿液，再用牙刷慢慢刷乾淨腹部嘅白色粉末，最後去除翅膀同尾，瀝乾倒入油鍋慢炒幾分鐘就完成。

食客就覺得臭屁蟲香脆可口，仲食得津津有味。有食客仲有獨家心得，表示「杜仲、豬尾、五指毛桃、陳皮等藥材煲湯，會更加美味。」

因為臭屁蟲咁值錢，農民仲研發咗系統捉蟲法，用大蒜去捉臭屁蟲嘅秘技！喺一個杯入面放置搗碎嘅大蒜，放去臭屁蟲下方熏一陣，臭屁蟲就會自跌入個杯，活捉臭屁蟲！唔知大家敢唔敢挑戰食臭屁蟲呢？