【自助餐放蛇起底組】買一送一 $99五星酒店Tea Buffet

雖然這個$198的二人同行優惠價只適用於星期一至五，但試食當日所見，非常爆場，職員仲話Booking已滿，有部份想walk-in的客人都要失望而回。而且有不少食客都是拎住「食飯袋」的上班族，絕對有理由相信佢哋係無食lunch，留肚進擊這個下午茶自助餐！

即睇有咩食！

自助餐區域都算大，兩張大長檯，再加一個長吧檯位，非常企理。食物款式都算多，有輕食類的Salad Bar、手指三文治，還有新鮮烘熱的歐陸包點，例如小牛角包、綠茶紅豆酥卷等。要飽肚的，都有即蒸的點心、伊麵、荷葉飯、少量西式意粉、薄餅等。當中點心的款式都算多，蝦餃、奶皇包、蒸粟米，就連燒賣都有分牛肉和豬肉兩種，賣相都唔差。

試食之前，小編首先想讚一讚自助餐碟的設計，除了大小、顏色不同的圓碟，還有這款九格碟，正好可以將食物分開，避免沾上其他食物的汁醬及味道，砌得靚嘅話仲可以影相呃下Like，幾好玩。

好！真。試食時間！熱食方面總算不錯，點心夠熱辣辣，奶皇包餡料頗多，略嫌欠缺了蛋黃香，亦都無流沙效果，但總算香甜軟滑；牛肉燒賣啖啖肉，有少少牛肉羶香，同事就唔太喜歡，不過牛魔王小編又覺得幾好味。蝦餃方面，皮就太厚，食落粉皮多過蝦肉，如果可以改善埋就最Perfect。荷葉飯都好足料，夠乾身之餘，仲有大大粒蝦乾，有嚼勁；西式Pasta醬汁的調味都恰到好處，總括而言都幾滿意。

食食下發現自助餐區排長龍，原來係即叫即煮的港式車仔麵檔，自助餐算少見喎！麵底有油麵、粗麵、幼麵、河粉、公仔麵；湯底都分豬骨湯和清雞湯；最後揀埋餸菜配料，真係好似車仔麵檔咁一格格，由上至下，左至加整齊咁排列好，款式仲夠晒正宗地道，五香牛腩、豬皮、魚蛋、蘿蔔、魷魚、豆卜、冬菇、菜類，最重要係連豬大腸都有得食！你喺 自助餐 幾時有見過呢啲街坊粗菜先？真係要讚這間酒店夠大膽創新。配料仲要任選！小編太為食，嗌下嗌下足足揀咗成五、六款餸，平時出去麵檔食，最多都係三餸，而且仲要任食任揀，抵食又好玩。

味道方面都唔差，表現中規中矩，零中伏。小編選的豬骨湯底不會過鹹，接近乳白色，飲落順喉，亦無味精口渴感，有香醇的豬骨肉香。麵底的煮製時間掌握得好好，即使排晒長龍，師傅密密手煮麵、夾餸，煮出來的麵質依然彈牙，唔會過腍。配料必食五香牛腩同豬大腸！前者燜煮得夠軟嫩鬆化，入口即溶，伴帶牛脂香氣，勁有車仔麵風味；後者同樣軟滑入味，而且清潔得很乾淨，完全無豬羶味，內裡的肥膏脂肪唔算多，女仔食咗都唔怕肥。冬菇的菇香好突出，如果可以多返啲蠔油味就更好；魚蛋都算大粒，有微微咖哩辣味；蘿蔔都清甜無渣。這個車仔麵拍得住街邊檔，夠懷舊夠本土，用來作為整個 自助餐 的醫肚環節，飽肚又滿足。

填飽咗正餐個胃，甜品胃又呼喚我出去搵食。有齊冷、熱款式，小編就最鍾意Apple Crumble，蘋果夠大粒，質感介乎腍身同爽口之間，肉桂味很濃郁芳香，面層的脆粒亦帶豐富牛油香，酥脆美味，暖笠笠很香甜。另外仲有各式芝士蛋糕，包括美國芝士蛋糕、藍莓芝士餅、海鹽焦糖芝士蛋糕，以及Tiramisu等，其中Tiramisu最好味，咖啡香、酒香兼偏，芝士慕斯口感輕軟，伴帶濕潤蛋糕，甜度適中，頗有層次。泡芙大粒又鬆軟，內裡的咖啡忌廉頗多，質感幼滑，好食。海鹽焦糖芝士蛋糕就略為失色，面層並不是焦糖脆，而是啫喱狀，食落亦感覺不到焦糖香，而且會和芝士蛋糕分離，層次頓失，扣咗少少分。但總括黎講，這一round甜品都食得開心，屬於酒店 自助餐 級數的靚甜品，女仔實啱！

總結：7.5 / 10

今次這個 自助餐 總算好滿意，食物的種類都算多，由輕食的Salad Bar到飽肚的熱食類、甜品都有齊，款式多樣之餘亦特別，未食之前行一轉都覺得滿意，食得過。尤其最鍾意Live Station的懷舊港式車仔麵，有驚喜，夠風味。食物質素都算高，爆場令大廚和職員Refill更快，食物更新鮮，某些食物略有缺點是 自助餐 少不免的，但大致上都不錯，味道良好，會想再食的。而且$198買一送一的價錢是超抵食之選，大家不妨Lunch hour捱多陣肚餓，到3pm在這裡來個下午茶all you can eat，值得一試！

Kudos
地址：銅鑼灣禮頓道8號香港銅鑼灣皇冠假日酒店1樓 (顯示地圖)
電話：3980 3000
下午茶自助餐供應時間:
星期一至五 3pm – 5pm
收費:
[由即日至4月4日] 優惠價 $198/位（可享買一送一優惠）大小同價
[4月5日起] 優惠價 $238（可享買一送一優惠）大小同價

備註: 收加一、收信用卡

延伸閱讀：
【自助餐放蛇起底組】沙田酒店Tea Buffet！$78任食紫薯朱古力甜品
【自助餐放蛇起底組】觀塘$108雞煲放題 食耐D平多D