【自助餐放蛇起底組】觀塘$108雞煲放題 食耐D平多D
時間計錢 $108起跳
望望收費表，雞煲最少要食1粒鐘，由$108起收費，不過食1粒鐘好似太趕， 2個鐘收$138，計落都平過坊間雞煲店喎！個半鐘收$118，更抵玩！一於挑戰下個半鐘，食快啲啲！雞煲可揀麻辣、香辣和奇味，另有烤魚可揀。
2個人有半隻雞，雞煲一上枱已經聞到好香好香啦，好想即刻開餐！雞件大件多肉，食落有少少嚡，但可以接受。醬料惹味，不過可惜雞件唔夠入味，少少失望。
串燒味道合格 火鍋料選擇少
每人會送3串串燒，可揀牛/豬/雞肉串、雞翼、丸類及菠蘿等。我哋叫了燒牛肉片、汁燒豬肉劃、鹽燒雞中翼、燒墨丸鹽、燒秋刀魚及燒菠蘿，肉串都燒得脆卜卜，味道正常，不過秋刀魚燒到有啲過，食落有少少苦，要扣分啊！
肉串燒得脆卜卜，味道正常。
食完雞煲呢，就行出去夾火鍋料返嚟打邊爐！不過出去拎嘢食條路有啲窄，睇路啊！自助區在一個雪櫃內，一眼望晒，有肉片、內臟、丸類、菇類、腸仔同和菜等，只有最basic嗰啲囉，選擇比較少，亦無自家特色配料。飲品可任飲，有汽水同啤酒。
咦，係咪差咁啲嘢呢？打邊爐必食嘅肥牛呢？見唔到嘅？非常非常非常可惜，肥牛竟然唔係任食！！！超失望囉！淨喺會送一碟特級手切肥牛，望下個樣先，吓？都唔以肥牛嘅，脂肪肥位咁少，邊忽肥啊？
呢碟偽‧肥牛size仲好迷你，食落彈牙有牛味，不過打邊爐我都喺想食肥牛多啲囉，還我真‧肥牛！！順帶一提，如果想再encore偽‧肥牛每碟就要收$68，有啲貴！
肉類味道差差差 個半鐘成功埋單
出面任揀肉類牛、豬、雞各有1款，即刻幫你試下伏唔伏！牛肉呢，個味勁似平時早餐食到嘅沙嗲牛肉，係咪朝早賣剩嫁呢？但個質感實在太太太粉，唔好食！
豬肉望落好正常嫁，大大件咁，不過食落口先知中伏!！！勁霉，嘔唔切！！最正常係個雞…粒，唔可以用一片片嚟形容，要用粒嚟形容，食得出佢有調味嘅，同埋幾滑，不過雞粒真喺無咩口感可言。
你最期待的埋單環節嚟啦！個半鐘呢其實食得飽嘅，亦都夠時間打邊爐，我哋六點半入座，八點鐘行出去收銀埋單，實收$118×2=$236，成功達陣！Yeah！
今次嘅靈魂係雞煲，夠惹味，唔夠入味同少少嚡就扣咗啲分；火鍋料選擇唔多，肉類味道更奇奇怪怪，感覺有啲hea。樓面不太夠人手，就算叫咗店員執枱加湯都要等下，但態度喺ok。環境比一般茶記光猛企理，拎火鍋料條路有啲障礙物，但坐得都舒服。
總分：5.5/10
金拇指米線
地址:觀塘裕民坊58-62號地舖 (顯示地圖)
電話:29557628
任食供應時間: 6pm-1am
價錢隨用餐時間而定 (以雞煲上開始計)
1小時:$108
1.5小時:$118
2小時:$138
2.5小時:$158
3小時:$178
3.5小時:$218
備註:不設加一，收現金及八達通
延伸閱讀:
【自助餐放蛇起底組】上水快食一粒鐘 $68 Lunch Buffet
【18區掃食】甜品控召集！西環最強甜品地圖
