【自助餐放蛇臥底組】$298大碗翅+大閘蟹放題

足料大碗翅湯濃魚翅一梳梳

太子酒家才新張不久，即推出這大閘蟹任食套餐。不過試食當天，仍是以點小菜晚飯的食客為主，知道有得任食大閘蟹的客人不多。坐低未夠5分鐘，侍應即送上每人一碗濃湯大碗翅。奶白的湯色很Pure，聞落飲落都充滿著雞湯香氣。宣傳單張寫明每碗足有二両翅，一梳梳的魚翅夾起來頗粗身，魚翅份量更多到有「食極唔完」的感覺，極之足料！

蟹膏爆但香氣欠奉

食完翅，仲要等多十幾分鐘，即入座近半小時，才上第一Pair大閘蟹，真係望穿秋水。熱辣辣上桌，大閘蟹Size略小，每隻只有三両多，開出來一隻金黃爆膏，另一隻的蟹膏卻「削」，淡淡黃黃，極之唔吸引。兩隻蟹的質素極之參差。

中途問問侍應，究竟酒家用何方大閘蟹？侍應一時說是流浮山，一時出是太湖蟹，如此疑惑的答覆，也令人很疑惑，信心盡失。

第二輪吃到尾聲，侍應才會詢問是否可以蒸第二輪。不過中途又是等等等，再十幾分鐘才有大閘蟹上桌。大閘蟹體積依然不穩，有大有小，開出來蟹膏都係唔靚仔，蟹香也不突出，失望。不過膏的份量是多的，也滿布透明狀的啫喱蟹膏，算是頂到一陣子口癮。

可能始終是小菜館，他們的蟹醋油潤香甜有層次；薑茶略甜，但薑味濃郁、熱度夠晒滾燙；每人一碗的臘味粒煲仔飯更是驚喜，臘腸、臘肉、膶腸切粒，飯粒分明炒得均勻，超香口，尾聲吃，很有滿足感。

埋單計埋茶芥加一，每人三百的消費，一人可吃三至四隻大閘蟹，計埋環境服務，又可以優遊地歎蟹，頗划算的。若然一心是想瘋狂吃蟹，又想吃到質素極佳的大閘蟹，可能便要再仔細諗諗啦。
太子酒家
地址：太子荔枝角道62號(顯示地圖)
電話：2333 8325
收費：$298/位（包4両大閘蟹任食、濃湯大碗翅一碗、臘味粒煲仔飯一碗、薑茶）、茶芥$10/位，另設加一。
延伸閱讀
【自助餐放蛇起底組】貴價金目鯛任食 $318狂掃頂級海鮮甜品
【自助餐放蛇臥底組】$208任食四両 大閘蟹放題