回顧絕版經典零食！6大童年回憶：四方果停產7年、巨星雪條翻生｜網絡熱話

撰文：新假期編輯部｜圖片：新假期資料室

6大絕版經典零食

1. 四方果啫喱

首創日期已無從查考，但喺香港銷售近20年，最初由牛奶公司生產，1997年左右牛奶公司向雀巢公司出售股權後，改由雀巢營運。

細細個一去超級市場都會叫媽媽買四方果啫喱返屋企，每次都諗好耐要買咩味，因為小孩總是貪心的！最傳統口味有士多啤梨、黑加侖子、青檸同荔枝，近年仲推出咗新口味「忌廉梳打汽水」，仲有用飲管吸啜新食法添，好可惜官方稱或會影響健康為理由而停產。

2. 絕版巨星雪條

嘉頓出品嘅三色雪條，有彩虹碎糖、雲呢拿味同西瓜味雪條混合而成。以為食落好奇怪咩，但竟然出奇地match！佢外形其實同宜家嘅手工雪條差唔多，不過價錢平過手工雪條成條街！上年阿波羅就推出咗「SuperStar」雪條，外形似足巨星雪條，唯獨底層口味係士多啤梨味而非西瓜味，懷緬經典零食必試！

3. 消失的香口膠黃箭白箭

香口膠牌子，最記得一定係箭牌香口膠！當年有3款口味，白箭同綠箭都係薄荷味，但後者較甜、仲有黃箭水果(香蕉？)味。想當年，小朋友嘅我最鍾意黃箭，因為味道係最甜，但現時黃箭白箭經已絕迹香港，只有綠箭香口膠有得買，不過再唔係一條條獨立包裝喇。

4. 最早期薄荷糖 嘉綠仙

當年嘅嘉綠仙係好似eclipse薄荷糖咁出名，身邊朋友總會有人袋住一盒旁身，之後出咗迷你嘉綠仙，仲方便攜帶添！依家喺日本仲有完全唔同包裝的「嘉綠仙」賣，不過味道道未知是否一樣了。

「係嘉綠仙至夠勁」係當年深入民心嘅Slogan，你仲記唔記得？

5. 暴暴飯焦

香港著名食家蔡瀾喺1990年代中進軍飲食業，推出暴暴飯焦，聽個名完全唔知係乜，拆開佢銀色包裝先知原來係肉鬆米餅！肉鬆米餅有推出唔同口味，如紫菜味等等，但都係原味最好食！

6. 女士最愛減肥雪糕 TCBY

TCBY係美國乳酪雪糕，TCBY意思係「The Country’s Best Yogurt」，以保健、唔油膩做gimmick，人稱「減肥雪糕」，曾經係全球發展超過3,000家專賣店，不過TCBY已經徹出香港，想回味就要去美國至有。以前Logo係綠色方形字體，宜家變咗粉紅色Logo，好陌生呀。

當年嘅廣告都好新穎好搞笑，分別有香港小姐冠軍李珊珊同台灣女星吳辰君出演，你有冇印象呢？

大家知唔知係香港邊度仲有得買呢啲經典零食？有嘅話記得話畀我哋知！