網民揀好一籬生果準備畀錢 遭阿婆夾硬搶：「呢份我嘅，同我包起佢！」| 網絡熱話
廣告
尊敬長輩係每個人應有嘅美德，但係若果長輩持老賣老，咁又值唔值得尊敬呢？自社交媒體興起後，就有好多老人同年輕人鬧交嘅新聞或影片出現，同時亦多咗「廢老」同「廢青」字眼，令兩代人之間隔膜愈嚟愈厚。早前就有網民投稿至「西客之道 Hispitality Secret」，大鬧遇到個衰阿婆喎！
撰文：Evita ｜圖片：西客之道Facebook專頁、新傳媒圖片庫、《果欄中的江湖大嫂》劇照
網民於街市被阿婆搶生果
早前有人投稿到Facebook專頁，回憶有年過節前夕去街市買生果……
我仲要返工又無得早收，收工急急腳衝去街巿想買d (啲)生果過節，但去到大半個街巿都收咗。
樓主指當時得返生果檔開，而且只有少量生果揀，於是樓主揀好幾個生果放喺個籬到準備畀錢。後來有個阿婆慢慢行埋去生果檔，一嚟就指住樓主揀嘅嗰籬生果：「呢籬我嘅！同我包起佢！ 收錢！」
樓主見狀：「喂！阿婆！我揀㗎喎！你要買你自己喺喥揀。」
阿婆：「我咩都唔知！我只知呢籬我嘅！收錢！」
呢個時候樓主就同生果檔老闆講：「老闆你睇住我揀㗎喎！你唔好執俾佢呀！佢好聲氣d (啲)都話啫！」
點知阿婆都唔執輸，叫老闆快啲收錢同袋起啲生果，更問要等幾耐。
而樓主就話結果係個老闆竟然笑笑口叫樓主當敬老，最後將籬生果賣咗畀阿婆，而阿婆臨走前仲要執返個尾彩，叫樓主慢慢揀，真係咪話唔谷氣。而樓主就話已經將呢間生果檔列入黑名單，永不幫襯。
而事件發布後就有唔少網民大鬧阿婆行為橫蠻無理，更有人話助長呢啲客人背後就係多得呢類老細。如果你係樓主，你又會點做呢？
