父子街頭MMA！老豆手執拖鞋激戰小鐵拳！連串粗口互轟｜網絡熱話

父子互轟粗口響徹全村

影片全長約兩分鐘，未有標示時間及地點，從影片背景推斷，現場似乎為村屋，泊滿共享單車。有網民指事件在香港發生，但亦有網民則懷疑事件在中國大陸廣州發生。

影片開始已見一名約十歲的小童，身型略橫，與頭髮斑白的老父互相打鬥，老父手執拖鞋還擊，用力揮打，幼子則用連環劈拳，不斷亂出捶打父親。期間兩人互轟粗口，「X家剷」、「X你老母」、「X街」響徹街頭滿天飛。

途人勸交不果 小童霸道怒斥和事佬

兩父子如出一轍的行為甚至惹來途人肉緊勸交，「差唔多，差唔多，得啦，得啦，差唔多得啦。唔好打，唔好打，你唔好還拖，你個Ｘ仔又係，無得咁打老豆嘅，老豆又點可以還拖呢，你再係咁就真係抵打㗎啦。」不過反招來小童惡言相向：「關你咩事！」老父曾一度向兒子好言相勸，「你去問吓人，我錯嘅，我錯嘅我跪係到同你講嘢。」

但兒子拒絕，「我唔問」一句後再惹起老父的怒火，「你X家剷，畀個老母縱壞晒。」但仍勸兒子先行回家，以免家醜外傳，可惜兒子倔強地表示「我唔返」，再掀爆口罵戰，「你X家剷，畀個老母縱壞晒。」影片未及交代事件最後如何結束。

網民食花生 研究父子用字互鬧不當

網民化身「花生友」，語帶嘲弄地說，「至少肯定係親生。」、「細時複製期不斷吸收，現在學以致用。」、「老豆身教個仔完全吸收晒。」有的網民更仔細地研究兩父子的用字，直指「兩父子嘅用詞都不當，互相鬧對方X家剷，其實大家都係鬧緊自己嘅家族，不如冷靜啲，飲杯茶，食個包，慢慢傾，兩父子冇隔夜仇嘅。」、「有其父必有其子，父母日常既言語溝通同行為，孩子學足9成！要孩子尊重，首先要學懂尊重孩子。」

資料來源：YouTube