灣仔南固臺鬼屋荒廢多年仍傳出女人慘叫聲 街坊無一不知！探靈少女鬼上身事件上埋報紙頭條 原來古宅前身係…？｜玩樂熱話

灣仔南固臺鬼屋荒廢多年仍傳出女人慘叫聲 街坊無一不知！
古宅前身係…？

南固臺於1918年建成，1943年主人杜澤文死於大宅內，死亡證上記錄「死因不明」。二戰時期日軍係灣仔建立咗唔少娛樂場所，所以當時灣仔又有「小東京」之稱，例如距離南固臺不遠嘅同濟中學舊址就係高級旅店「千歲館」及會所「千歲花壇」，日軍於船街設立慰安所，而建築雅致的南固臺則被佔領作「貴賓廳」，成為囚禁慰安婦嘅地方。

但自日軍投降後，有住呢一個慘痛經歷嘅南固臺大宅一直廢置，仲時不時有怪事發生，盛傳鬧鬼。例如有街坊話每晚去到深夜，屋內就會出現一團團綠色怪光同怪火飄浮，細心聽更會聽到陣陣女人嘅喊聲同慘叫，非常哀怨。有人仲曾經見到一個著住紅色旗袍嘅女人向佢招手，面上露出詭異笑容，於是紅屋漸漸變成左生人勿近之鬼屋！

探靈少女被鬼上身上埋報紙頭條

最誇張係2003年有八個男女同學相約零晨到船街，夜探鬼屋，其中三個女仔一踏上通往大宅嘅麻石樓梯，就見到一個白色鬼影向佢地招手，於是大驚轉身逃跑，但跑到皇后大道東又突然失常，不斷狂叫話要返紅屋，大叫「佢哋好掛住我！」，其中一人仲變男人聲，最後要多名警員合力先將三人制服送院 。呢個疑似鬼上身事件成為左各大報章頭條，令灣仔鬼屋再次聲名大噪。

2018年南固臺業主合和實業向城市規劃委員會提交改劃申請，計劃將南固臺周邊一帶合併發展，保留歷史建築物，改作一個最多容納50個座位的證婚場所，唔知會邊對先人⋯⋯吖新人先啱，會夠膽係呢度結婚行禮呢？