強行拉開港鐵幕門大隻仔行為令人嘩然！網民：「故障就係多得呢啲人！」｜網絡熱話

新假期 - 影視

Oct 11 2021

廣告

港鐵朝朝都人迫人，但想格硬迫入車廂都唔易。香港人生活節奏急促，做事爭分奪秒，不過急還急，都應該遵守規則嘅。網絡上廣傳大隻仔強行拉開港鐵車門而成功上車嘅片段，一眾網民見到都表示嘩然啊！

撰文：Evita｜圖片：香港交通突發報料區

壯男強行拉開港鐵幕門上車

一條約10多秒的影片被上載到Facebook，片中見到一位睇落幾大隻嘅男士喺港鐵月台上狂奔，左穿右插人群之後到達正準備閂埋嘅玻璃幕門，壯男伸出左手攝入幕門中間，紮隱馬步，再用雙手拉開幕門。

男士先強行拉開玻璃幕門。（圖片來源：Facebook）

三兩下手勢就拉開。（圖片來源：Facebook）

幕門亦沒有反彈。（圖片來源：Facebook）

玻璃幕門打開後，壯男再次使出強而有力嘅臂彎，再次將港鐵幕門強行打開，最後成功上到列車，而車廂入面嘅人都不禁望住壯男。

成功開玻璃幕門後就開車門。（圖片來源：Facebook）

花了點力氣才把車門拉開。（圖片來源：Facebook）

眾人驚訝下進入車廂。（圖片來源：Facebook）

網民即刻大鬧：「好自私！」

片段被擺上網後，有唔少網民都話港鐵故障就係多得呢啲人，亦有人大鬧壯男行為自私，阻人時間之餘更有機會令自己受傷。

呢個行為其實非常自私！（圖片來源：Facebook）

不過都有心水清嘅網民認為係一早同拍片者夾好，亦有人發現拍片同出post人士都係壯男嘅女朋友，女友仲要大讚男友「發現變形俠醫！這是我的男朋友」。

就算要拍片都唔應該用呢個主題！（圖片來源：Facebook）

不過點都好啦，始終呢個行為係唔恰當兼有可能犯法啊！根據港鐵公司的《香港鐵路附例》第II部第9點指出，任何人不得在列車車門開始關閉後進入或離開列車，亦不得企圖在列車車門開始關閉後進入或離開列車；任何人不得干擾鐵路處所內的任何門或閘，包括任何列車車門及月台幕門，觸犯條例最高罰款港幣2,000元。

（圖片來源：新傳媒資料室）

撰文：Evita｜圖片：香港交通突發報料區

關鍵詞

港鐵網絡熱話網民