港鐵暈低要坐輪椅搭𨋢！網民鬧爆：𨋢內無人肯讓位 個個冇血性！｜網絡熱話
廣告
如果扶手梯太遠，坐港鐵落車的你係咪都會揀搭𨋢？有連登網民喺討論區發文，指家人喺港鐵不適暈倒，職員推輪椅送家人上去，進入升降機時無人肯讓位，鬧爆𨋢入面嘅人無血性。
撰文：Evita | 圖片：連登討論區、港鐵官方網站、劇照、pexels
家人暈低！港鐵𨋢內無人肯讓位
日前有網民以「你哋班X樣係咪已經冇哂血性？」為題，指坐港鐵返工時屋企人因為血糖問題喺地鐵暈倒。網民通知職員後，職員幫手推輛椅上去，打算叫救護車。
不過網民就話部𨋢到咗之後，職員叫入面嘅人出一出嚟讓畀病人入先，點知入面所有人都無動於衷。
網民憶述當時𨋢入面嘅情況：
「有啲就玩手機，有啲就傾計，最令我心寒嘅係有幾個人木口木面咁望住坐喺輪椅的病人。」
網民就話嗰一刻忍唔到，指住班人鬧佢哋無血性，先有幾個人願意走出嚟。不過騰空嘅空位只夠輪椅同職員入，而自己就要跑扶手電梯去匯合屋企人。網民表示呢啲自私行為令佢覺得好心寒，亦叫大家好好反省。
網民：香港人就係咁！
有人就留言「香港人本性就係咁」，更有人表示「趕住返工，畀人炒咗係咪樓主幫佢供樓」反駁樓主。
