2歲半女兒被男童掌摑！大肚港媽投訴反被新移民媽1句惡毒詛咒｜網絡熱話

大肚港媽帶2歲半女兒！慘被男童掌摑

大肚港媽投稿至Facebook專頁，指一年半前，當時懷孕9個月嘅佢帶住2歲半嘅女到公園玩，有一個同佢囡囡差唔多大嘅男生同囡囡爭公園玩具，但係男仔突然兜把打落囡囡塊臉，囡囡塊臉即時紅晒，大肚港媽見狀就出聲話個小朋友。

大肚港媽：「小朋友，你唔可以打人㗎喎，公園大家一齊玩，大家可以做好朋友。」

點知個男仔用力踢網民個女，而男仔個媽媽一直傾緊電話，見唔對路就衝咗埋去。

大肚港媽：「你好，你仔仔又打又踢我個女喎！」

而男仔阿媽就用唔鹹唔淡嘅廣東話回應：「咁又點啊？」

港媽護女被詛咒流產

大肚港媽：「佢打人喎！」

對方：「咁你咪叫你個女打番佢囉！」

大肚港媽：「我唔會囉，佢唔啱應該好好同佢講，我唔會教我個女打人。」

對方：「再講打埋你啊，生咗個女好叻啊，你個女好巴閉咩，唔打得啊？」

大肚港媽：「我個女緊係唔打得啦，我無啦啦打你個仔得唔得啊？」

點知對方竟然用粗口鬧網民：「生啦生啦，香港人威啦，生埋啲垃圾，小心流產啊，生個傻嘅，生個白痴嘅，生個有問題嘅，睇你點罵！」（文字經過修飾）

如是者，網民以為呢件事就咁算數。點知發現兩個小朋友係同一間學校之餘仲要係同班，網民問大家：「我係咪好慘？」

網民留言：要反擊！

事件獲得唔少網民留言回應，有人就話應該要教小朋友以牙還牙，對方「誠邀」自己打佢個仔就應該唔好畀面，有人更建議大肚港媽應該報警告佢傷人。

資料來源：FB@生仔要考牌系列