海洋公園靈異傳說！80年代纜車墜落一家四口命喪山坡 到底真相是？
廣告
諗起細細個爹哋媽咪帶我哋去海洋公園玩，充滿咗好多美好嘅回憶，但有無人諗過主題公園歡樂嘅背後流傳左不少駭人嘅都市傳說。其中有傳係80年代初，海洋公園嘅登山纜車發生一宗嚴重事故，最後一家四口名喪黃泉，後來仲有職員於意外地點撞鬼等傳聞，究竟係真有其事抑或係以訛傳訛呢？真相到底是？
海洋公園靈異傳說！80年代纜車墜落
一家四口喪命山坡 遊客員工齊撞鬼
傳聞係80年代初，海洋公園開幕冇耐之後，有一日有一家四口到公園遊玩，但當佢哋登上纜車不久後，山上突然刮起一陣怪風將纜車吹至斷纜，掉落山坡後四人即場喪命，死狀恐怖。而政府及園方為咗保護新興建嘅樂園，決定封鎖消息以及俾「揞口費」了事，但有聲稱自己係目擊證人走出黎，表示當時喺現場，因為清理現場需時，公園動用直升機以海馬旗蓋住墮落纜車現場，言之鑿鑿！
自此之後靈異事件陸續發生，有遊客聲稱乘搭纜車途中見到山腳有一架毁壞咗嘅纜車，細心一睇仲見到入邊坐咗四個人一齊面帶詭異笑容向上揮手；亦有自稱海洋公園員工分享自己有一日清晨返工，由於纜車尚未啟動而搭自動電梯，但見遠處有個女人目無表情咁向佢走埋嚟，最恐怖嘅係喺佢哋兩個差唔多碰面之時，個女人突然間消失不見！而其他同事亦都同佢講佢哋都見過呢個女人，長頭髮，大概4、50歲，於是認定佢就係呢一家四口嘅媽媽。
海洋公園靈異傳說究竟孰真孰假?
海洋公園纜車經理簡英富曾經喺2006年接受訪問，佢提到喺80年代初南朗山山頂出現過一次龍捲風，影響纜車行駛需要即時搶修及將遊客送回車站，而早期纜車設計車頂較高，比較容易脫落，所以當時其中頂一車蓋被吹落山腳，遊客見到以為成架纜車被吹跌，以訛傳訛之下由纜車停駛維修變成一家四口慘劇，而事實上嗰次嘅意外無人受傷，究竟呢件事純粹係一場誤會定係好似坊間所傳嘅真有其事呢？
海洋公園有什麼靈異傳說？
傳聞80年代時，有纜車墜落，令一家四口命喪山坡，更傳出…詳情
到底真相是什麼？
海洋公園纜車經理簡英富曾經喺2006年接受訪問時稱…詳情
圖片來源：LIHKG, 香港高登討論區, Unsplash@aevielcabral, Unsplash@jorok, Unsplash@dani_h, Unsplash@kelvinyan, Unsplash@yuhandu,
