洪永城親試！ 北韓 都有娛樂 （下集）
跟蹤金仔 視察水上樂園
文綉水上樂園被視為北韓的面子工程，開幕當日連金正恩都有到場視察。Tony難得遊北韓，當然要嚟朝聖啦！他說：「我有玩大型滑梯，有好多個轉，比我想像中刺激！場內有好多當地小朋友，見我哋喺水中拎出攝影機，似乎都唔太驚訝。」
事關佢哋都好興帶手提電話、相機（不過就似十幾年前香港流行的款式）入泳池影相，可能有得玩水是一件很難得的事吧！」玩水之餘，Tony亦不忘留意北韓囡囡的潮流走向，泳衣款式都以一件頭為主，三點式bikini絕跡！
玩夜場！平壤巴閉主題樂園
平壤有兩個較為人知的遊樂場，分別是舊到得人驚的「萬景臺遊樂場」， 以及Tony 去的「凱旋青年公園遊樂場」。後者更是當地首個夜間開放（晚上7時至凌晨12時）的遊樂場，問他過程會否擔心停電或人身安全，他說：「無事喎！機動遊戲完全唔係流！我比較擔心拍攝前吃得太飽，玩海盜船玩到嘔！場內仲有機舖，Game 款都新唔似二手貨！」
在北韓睇「都敏俊」隨時被送去勞改，當地人只可以睇土炮劇集，內容好唔好睇見仁見智、但原來製作都OK認真，行程參觀了「平壤影視城」！Tony 說：「規模都幾大，估唔到條布景街比TVB 電視城仲多元化，中、日、歐洲街景都有齊，幸運地仲邀請到一位當地演員臨時拉伕入鏡㖭！」
在北韓遇到的N個人
記得之前Tony 主持《走過烽火大地》，被批評做得未夠深入，不少時間都匿喺車廂拍攝。今次北韓之行禁忌雖多，卻驚喜不絕，Tony 說：「今次好難得，唔使靠旅遊專車點對點接送，可以喺街道上行走和拍攝，亦意味可以隨便在街上與當地人直接對話。」
可能係世上最貴嘅自拍！
今次節目未出街先曝光，緣於一張在金日成銅像前的fb 自拍照、成功呃like，不少網友驚覺原來北韓都可以上網，Tony 解釋：「平日遊客只能申請到僅供通話的電話卡，除非是經常往來的外國人，或像我這類特例，才可以經旅遊局特別申請連上網的電話卡。
價錢都唔平，HK$1,800已包7天採訪行程通話費，另送150M 上網，網速只有500K，到出境時歸還。我覺得貴得有價值呀，因為不局限於酒店範圍，在北韓全程都用到，最勁可以上埋fb，玩Facetime，連翻牆都唔使！」
拍攝6大禁忌！
1. 講錢就傷感情，凡是朝鮮幣的匯率、物價等通通要避！
2. 影領袖人的銅像，一定要影全身！影漏隻腳，隨時唔使返香港！
3. 冇批准不可以拍攝街上的軍人。
4. 返酒店之後，不得隨便進出。
5. 提到北韓，不可以講North Korea，一定要講DPRK朝鮮！
6. 只可以影北韓美好一面，好似修路、維修等，一律唔准影！
