【懶人神器】嫌吹頭洗頭太麻煩　網紅發明自動洗髮機幫到你！

撰文：GW｜來源：微博@手工耿

呢位網紅發明家「手工耿」可能因為自己都係長髮，所以特別了解長髮人洗頭嘅痛苦之處。不止要洗、要沖、仲要吹乾，可能成個過程就需要用上成個鐘頭，不止耗費時間仲十分浪費精力。

因此手工耿就用咗佢強大嘅創造力同心血，打造咗呢一部集「洗頭、沖水、烘乾」於一身嘅自動洗髮神器！聲稱仲可以邊洗頭邊做健身運動，符合現代人忙碌嘅生活節奏咁話！

自動洗髮機使用方法：

因為呢部自動洗頭機係採用倒立式設計，只要㩒個制後就會成個倒轉，要靠自己力量堅持喺塊板上面，從而達到洗頭同健身嘅效果。BTW因為都係倒立式設計嘅緣故，只要倒轉後一注水，就呼吸唔到，所以要事先拎衣夾夾住個鼻同咬住浮潛用嘅膠管呼吸。

準備工夫做好同心理建設做好後就可以㩒制開始倒立同注水。

當注水成功後就可以開啟漂洗模式（類似洗衣機），秀髮就開始隨著水流擺動，水流速度仲極快，頭髮可謂無死角地被洗乾淨，仲不傷髮質。

當覺得頭髮被洗淨後，就可以將洗髮後的污水排走。自動洗髮機在洗頭處自帶吹頭烘乾設備，只要在原位再堅持倒立一陣子，颱風級別的風速就會將你的秀髮吹乾，非常貼心。

「自動洗髮機」創作者手工耿表示，這樣洗完再吹出來的頭髮蓬鬆又自然。

網民回應

百萬網紅「手工耿」本來就以發明「無用嘅產品」為特色而聞名網絡（手工耿微博）。網民就表示「點解可以一表正經咁認真地介紹咁無用嘅發明？？」、「未用完應該已經腦充血」、「產品做工複雜又精緻，不是專家絕對製造不出來！但真的很無用！」、「如果有一日手工耿發明嘅嘢有用，我就取消關注！」

影片

https://www.youtube.com/watch?v=EH5SAEXVl0M