港男重臨沙田驚嘆物價超貴：住得都好有錢、連小朋友都周身名牌

住沙田嘅人好有錢？

01 ｜餐廳價錢貴 人均都要$150

事主在沙田新城市行一轉，發覺餐廳好多都轉晒，「開咗好多cafe，新日本fusion，食cake店，肚餓想去食吓嘢，試吓啲新餐廳，點知望望個餐牌，叫樣嘢都平均$150，仲要細細份」，事主指很多間餐廳都是高消費，門面靚而且入座率高，「個個都叫好多嘢食，見到有間台灣嘢，諗住叫個鹽酥雞飯同珍珠奶茶食，點知淨係個飯都過百，杯珍珠仲$48杯，即刻冇叫行返出來」。

02 ｜歡樂天地消費高 玩個遊戲都要$12-$16

事主去新開的歡樂天地，「入去望吓重溫吓兒時回憶，點知換個遊戲幣都要$2一個，玩個game都要6-8個幣，見人地一家大細玩得好開心，碇彩虹，fing錢咁fing」，事主坦言自己就唔捨得蹝錢玩，唯有望住人地玩。

03 ｜好多年輕夫妻行商場 小朋友周身名牌衫

事主直言好多年輕夫妻行商場，身上都著潮牌，甚至他們的小朋友都著名牌衫，「同我細細個差好遠，行咗成個商場，樣樣都幾百幾百，好貴，見到人地好歡樂玩，食，消費，但自己一樣嘢都唔捨得係到洗，好似自己唔屬於呢個地方咁」。

網民：個個都大把錢

事主最後去禾輋食茶記，更坦言不解沙田人「點解可以搵咁多錢，食得起，玩得起，係咪個個月入十萬㗎？一家大細食餐飯都$500-700，又玩又買嘢，點解咁有錢」，有網民留言表示行商場好多都講普通話，「好正常啦， 每個星期六日啲Tesla名車等泊入新城市排晒長龍， 個個都大把錢」。

網民反笑樓主窮：既然買唔起樓咁不如洗豪啲算

有網民指以前新城市的餐廳較平民化，「陽光餐廳、馬里奧餐廳、麥記之類，自從大裝修又多咗自由行就唔同晒」，不過有網民食花生指樓主窮，「有冇問過自己付出咗幾多？付出過但係咪又唔夠人哋多？」、「好多都係表面光鮮，既然買唔起樓咁不如洗豪啲算」。