水貨客大街執貨 紙皮、膠袋散落一地！ 網民：「食環去晒邊？」

撰文：Evita | 圖片：Facebook

水貨客大街執貨紙皮、膠袋散落一地

日前有網民喺Facebook發布一張相，相入面路牌寫住「新榮街」，地點理應係上水。相中見到一班疑似內地客喺連鎖零售店門口排隊，亦有人踎低執袋執行李箱，產品包裝盒同膠袋散落一地。

隨後另一位網民再上載一張堆滿紙皮箱嘅相，雖然地點唔一樣，不過都引起唔少網民留言鬧爆水貨客同食環署。

買嘢唔係問題，但係掉到一地垃圾就有問題喇！影響市容之餘又增加清潔工人嘅工作量，所以做人真係唔好咁自私！

其實除咗上水，香港仲有好多地方已經被水貨客「攻陷」，就好似今年新年時，內地就有網站推出「香港辦年貨攻略」，推介內地同胞到港掃貨，內有詳細嘅行程、折扣優惠、交通提示。

最多人去嘅上水固然之會失守，但係原來中環國際金融中心（IFC）、沙田新城市廣場、連城廣場、銅鑼灣祟光百貨都受到內地客熱捧。有網民喺「百度貼吧」出post激讚IFC：「買的、吃的、看的一應俱全，無論你想入手甚麼年貨，IFC mall都應滿足你在香港的購物慾。」睇嚟今年中環上班族要應付陸客喇。

有內地網民亦喺內地網站撰寫詳細「香港年貨哪裡掃？」教學，裡面有列出六大重點，主要係教大家到沙田新城市廣場一站式購物，買傳統糖果、乾果就要到上水、元朗同屯門、就連上環海味街都係其中一個必到景點！

有內地旅行社推出5日4夜旅行團，每人盛惠3,125人民幣。旅行團行程主要包括全日迪士尼，黃大仙祠祈福、食米之蓮推薦晚餐，重點行程係去 辦年貨

。

唔單止咁，微信亦都整合出「香港春節購物優惠」，只要輸入相關字眼，系統就會回覆一連串優惠券同購物資訊。

眾多內地旅行團將會嚟香港，加上港珠澳大橋開通，內地人訪港就更加方便，各位港人不妨考慮去旅行或到較少人嘅地方吧！