陳慧琳、楊千嬅、梁詠琪演唱會睇邊個好！網民意見一面倒 呢個人最多負評

網民熱議3大演唱會睇邊個好！
梁詠琪演唱會被指似唱K、楊千嬅演唱會飛賣唔出？

1.梁詠琪

梁詠琪（Gigi）於1995年出道，憑著清純的形象及一對長腿成為90年代當紅的歌手及演員，出道逾25年有不少代表作，包括《花火》、《高妹正傳》、《膽小鬼》等，故今次開演唱會對8、90後來說絕對是回憶殺。不過今次Gigi遭商台DJ梁文禮在社交平台明讚暗踩，除了指她似唱K，更嘲笑她其中一套表演服似「抹完鼻血嘅紙巾」，惹來不少人討論。

而不少連登網民稱讚Gigi外形「煞食」，指「​​梁詠琪係靚，同埋咁高行出嚟贏晒，著衫都好睇啲」、「有樣有腳有台型叫睇得下」，但對於今次演唱會的表現，有人稱「差都唔係第一日嘅事」、「佢同楊千嬅真係上一代嘅典範：冇料到，但食正黃金時代就上到位」，認為「明星靠包裝靠PR（公關）」，不過有人撐Gigi紅得有道理，稱「當年夠青春又靚又有k歌，唔紅都難」、「根本係賣玉女青春偶像，佢紅係正常因為大把仔冧佢」。

2.陳慧琳

現年50歲的陳慧琳（Kelly）於1994年出道，是90年代女神級歌手，同樣有高挑身材，有網友指Kelly樣貌標緻是公認的靚女「只係把聲煩膠姐」，但亦有人指Kelly「鬥雞眼」、「三白眼」，但亦有唔少人稱讚Kelly形象高貴有台型，以偶像歌手來說「唱歌冇乜大甩…同佢嘅電音横掃中港台disco」。而早前Kelly到新加坡開騷，以fit爆身形又跳又唱，獲得不少好評。

3.楊千嬅

楊千嬅於1995年參加新秀歌唱大賽入行，因大笑姑婆形像正面，加上當時獲金牌填詞人林夕疼愛，為她寫下多首易上口的好歌，令她在90年代尾至00年爆紅。不過近年千嬅被網民封為「楊千嬋」、「樂壇人瑞」，人氣不再更獲一面倒負評，出道多年唱功一直被詬病，常被指「唱歌難聽」、「走音」、「唱live完全唔掂」，早前參與內地真人騷更被王晶暗寸演技一般，就連去年底的演唱會亦傳出銷情欠佳，要用黑布遮位，令演唱會在一片爭議聲中落幕。

有網友嬲爆稱「咪拎兩個（指楊千嬅與梁詠琪）嚟比啦，梁詠琪有樣有腳有台型叫睇得下，另外嗰個有咩嘢，佢就真係死付碌啦」，直指千嬅「明顯再低一個級別，樣同實力都無」，看來千嬅要絕地反擊仍有點難度。

資料來源：連登討論區