【 東京 】哥斯拉改邪歸正 歌舞伎町迎賓
廣告
特別報告！踩冧 東京 之重任已經由特撮天王哥斯拉，剛交棒畀愛買電飯煲同廁所板嘅大媽陸客喇，因為哥斯拉早前被委任為新宿觀光特使，洗底從良，即日起日以繼夜夜以繼日站立於歌舞伎町噴煙咆哮娛賓，仲擔任新宿最新酒店Hotel Gracery 的「榮譽經理」招呼住客，好客過山東，無晒霸氣！不過，好似台場高達一樣，哥斯拉出馬，酒店唯一一間主題套房已經爆到9月，另一種同哥斯拉眼望望的單人房只淨返零星數量，酒店亦規限開業首月只准住客同享用café的客人走出8樓Lobby 平台，近距離睇哥斯拉噴煙示眾。如果唔住酒店又想趁哥斯拉熱，不妨到旁邊戲院大樓的食肆一嘗哥斯拉噴火大阪燒，或者去對面街Prince Hotel 遙望哥斯拉頭食佢條尾！
遊日咳神出新書
插畫師咳神同港女老婆Caca前排喪POST遊日相，又試膠囊酒店、女僕Café，上周咁啱身在東京，於是特意搵佢畫返張哥斯拉直擊。原來兩位出走日本三星期，為籌備兩本新書！第一本是跟飲食Blogger玩勻京阪神與奈良，介紹美食同大量櫻花景點；第二本就是他兩口子暢遊東京的飲食買物旅遊工具書，由咳神畫，Caca負責寫攝。咳神話：「難得搵到贊助出書，行程中係咁搭的士，又去食米芝蓮餐廳，有感之前去得好慳儉，今次好豪呀！」想睇就要等書展喇！
Hotel Gracery Shinjuku
•地址：東京都新宿區歌舞伎町1-19-1 (顯示地圖)
•電話：+81（0）3-6833-2489
•房價：普通雙人房¥17,000/HK$1,106起
•交通：JR新宿駅東口步行5分鐘
•網頁：gracery.com/shinjuku
更多日本資訊：2015 必到！東京原宿 潮食新 Mall
