杜汶澤同叻哥陳百祥齊上港台Live 大談社會局勢 阿澤：會以禮相待！｜網絡熱話
廣告
社會活動仍然未平息，不少藝人都曾經為此而發聲表態，其中陳百祥（叻哥）同杜汶澤（阿澤）的政見更是相反到極點。今日香港電台節目《視點31》就在Facebook上宣佈，邀請咗阿澤同叻哥一齊上Facebook Live傾吓，消息一出，網民就話要去搶購花生、爆谷等睇戲！
撰文：GW｜來源：香港電台節目《視點31》
杜汶澤、叻哥上港台節目《視點31》開Live！
港台節目《視點31》由2014年開播，其中一位主持是獲封「新聞女神」的利君雅。但可惜明日（11月5日）的Facebook Live不是由利君雅來作主持。《視點31》今日就在Facebook上宣佈，邀請咗阿澤同叻哥一齊上Facebook Live傾計，網民即時表示好期待！
杜汶澤：我承認我係有啲緊張，因為佢始終係我偶像
杜汶澤在個人Facebook上出post指：「首先，當收到利君雅嘅來電，我承認我係有啲緊張，因為佢始終係我偶像。」而且一開始他是拒絕的，並表示：「討論嘅對象係幻想自己如果係警務署長就一早開真槍嘅陳百祥，問我有無問題，我就話no喇！」仲話自己脾氣唔係幾好，怕影響香港電台一貫健康、持平中立嘅形象咁話喎。
後面阿澤才表示：「雖然聽日唔係利君雅做主持，但係既然佢打得比我，我一定會支持佢。所以我應𠄘咗，做呢個節目。」同時多謝叻哥肯應約。
至於網民就話好期待阿澤會爆粗甚至動武，但阿澤就表示：「我應承咗利小姐，會以禮相待，唔會令佢孭鑊，大家可以死咗條心。」相信兩位政見不同的人，到時一定火花四濺。有興趣嘅朋友，11月5日 16：30，準時收睇《視點31》Facebook直播啦！
