單車踩中線 私家車響咹反遭中指問候！CAM主發帖取暖再被怒轟：你隨時犯法

彌敦道踩中線 司機響咹提醒反遭單車手中指問候

片入面離遠可以見到單車手原本係喺左線行，但彌敦道左線大部份都係巴士線，而當時都有好多巴士埋站上落客，單車手於是轉入中線繼續踩，而由於速度嘅差距私家車好快就追上架單車，一個路口都未到嘅距離之後只見單車手回頭望後向片主兩度舉中指。由於影片冇聲，但喺描述內容片主形容「輕輕呠你兩下話你知後面好多車」，應該係單車手聽到司機響咹之後回頭回應。

網民反應超極端：多此一舉＋危險駕駛！

有眼利嘅網民就睇到單車手由左線入中線嘅時候無俾手勢，表示單車踩上路面都應該要考牌，而伸出中指呢個行為亦都有錯，但除此之外更多聲音係支持單車手，大鬧私家車司機冇品。片中可以見到巴士線有多部巴士埋站，單車手有權切入中線爬頭，如果每經過一部巴士都要左中交替其實會更加危險，影片入邊亦都未見任何危急情況，「提示」本身並非響咹嘅其中一個用處，咁做已經有機會犯無故響號罪。

更何況係呢個情況之下司機的確跟得太貼，無緣無故下響咹更容易嚇親單車手，本身係繁忙路面就唔應該揸得太快，但係如果趕時間其實可以用快線，冇需要為咗爭啖氣而「呠」其他道路使用者，所以有好多同樣係駕駛者嘅網友都覺得cam主行為好冇品之餘，其實已經涉嫌危險駕駛，如果發生意外，私家車嘅殺傷力比單車實在差距太大。